ئەمریکا داوا لە سعودیە و ئیسرائیل دەکات پەیوەندیی دروست بکەن

 

رۆژی دووشەممە، 5ـی حوزەیرانی 2023، ئەنتۆنی بلینکن، وەزیری دەرەوەی ئەمریکا پێش دەستپێکردنی گەشتەکەی بەرەو سعودیە، لەبەردەم لیژنەی کاروباری گشتیی ئیسرائیل - ئەمریکا، ناسراو بە AIPAC، دروستکردنی پەیوەندیی لە نێوان سعودیە و ئیسرائیلی بۆ ئەمریکا بە "گرنگ" دانا و داوای لە هەردوو وڵاتەکە کرد ئەو پەیوەندییە دابمەزرێنن.

 

بلینکن گوتی: "ئەمریکا بەرژەوەندییەکی راستەقینەی نیشتیمانی لە دروستکردنی پەیوەندیی نێوان سعودیە و ئیسرائیلدا هەیە. ئێمە پێمانوایە دەتوانین رۆڵێکی بەرچاو لە بەرەوپێشچوونی پەیوەندی نێوان ئەو دوو وڵاتە بگێڕێن."  

 

وەزیری دەرەوەی ئەمریکا ئاماژەی بەوەشکرد کە وڵاتەکەی پابەندە بە "رێککەوتنی ئەبراهەم"، هەروەها راشیگەیاند. هەرچەندە ئیسرائیل و سعودیە لەسەر چەندین ئاست پەیوەندییان هەیە، بەڵام تائێستا سعودیە هەنگاوی بەرەو رێککەتنەکە نەناوە. 

 

رۆلی ئیسرائیل لە ناوچەکە، بەگوتەی، بلینکن، "رۆڵێکی گرنگە و دەبێتە هۆی سەقامگیری و خۆشگوزەرانی زیاتر لە ناوچەکە."

 

بلینکن گوتی: "هەوڵەکانی یەکگرتن و دروستکردنی پەیوەندیی نێوان ئیسرائیل و سعودیە، پەیوەندی بە پێشکەوتنی پەیوەندییەکانی نێوان ئیسرائیل و فەلەستین نییە."   

 

بلینکن لە پێش ئامادەبووانی لیژنەکە جەختی لەوە کردەوە کە واشنتن رێگە نادات تاران ببێتە خاوەنی چەکی ئەتۆمی و گوتی: "ئەگەر ئێران رێگە دیپلۆماسییەکان رەتبکاتەوە، ئەوە سەرۆک بایدن بە روونی باسی لەوە کردووە کە هەموو بژارەکان لەبەردەستن."  

 

ئیسرائیل لەگەڵ ئیمارات و بەحرێن، لە ئەیلولی 2020، بەنێوەندگیری ئەمریکا پەیوەندی دروستکرد، دوای ئەوەش، ئەمریکا رێککەتنەکەی بە "رێککەوتنی ئەبراهەم" ناوبرد و داوای لە وڵاتانی دیکەی عەرەبی کرد کە بێنە نێو رێککەوتنەکە. 

 

رۆژی دووشەممە، 5-6-2023، ناسر کەنعانی، گوتەبێژی وەزارەتی دەرەوەی ئێران رایگەیاند: "لە رۆژی سێشەممە و چوارشەممەی ئەم هەفتەیە بە فەرمی باڵیۆزخانەی ئێران لە شاری ریاز و کۆنسوڵخانەی گشتی لە جەدە و نووسینگەی نوێنەرایەتیی ئێران لە رێکخراوی هاریکاری ئیسلامی دەکرێنەوە." 

 

رێککەوتنەکەی ئێران و سعودیە بووەتە جێگەی نیگەرانیی ئیسرائیل و بەربەست لەبەردەم هەوڵەکانی ئیسرائیل دروستدەکات، کە دەیەوێت لەڕووی دیبلۆماسییەوە، ئێران گۆشەگیر بکات.