هێرشەکانی رووسیا پێنج کەسیان لە ئۆکراینا کوشت و کارەبایان بڕی

 

 

هێزی ئاسمانیی ئۆکراینا بڵاویکردەوە، هێزەکانی رووسیا 496 درۆن و 53 مووشەکیان بۆ ئۆکراینا هاوێشتووە کە زۆربەیان خراونەتە خوارەوە.

 

ڤۆلۆدیمیر زیلینسکی، سەرۆکی ئۆکراینا گوتی: "بەداخەوە، پێنج کەس کوژران. سەرەخۆشیی خۆم ئاراستەی هەموو ئەوانە دەکەم کە بەهۆی ئەم تیرۆرەوە، ئازیزانیان لەدەستداوە."

 

هێرشەکان چوار کەسیان لە نزیک لویڤ کوشت کە دەکەوێتە رۆژئاوای ئۆکراینا و دەیان کیلۆمەتر لە بەرەی جەنگەوە دوورە. ئاندری سیبیگا، وەزیری دەرەوەی ئۆکراینا گوتی: "لە نزیک لویڤ، خێزانێکی چوار کەسی لە ماڵەکەیاندا کوژران ."

 

هێرشەکان کەسێکیان لە هەرێمی زاپۆریژیای باشووریش کوشت و چەند کەسێکی دیکەشیان لە نزیک بەرەی رۆژهەڵات بریندار کرد.

 

خزمەتگوزاریی فریاکەوتنی ئۆکراینا بڵاویکردەوە، هێرشەکان کارەبای زیاتر لە 110 هەزار هاووڵاتییان لە چەندین ناوچە بڕیوە و زۆرترین زیانیش بەر زاپۆریژیا کەوتووە.

 

تۆڕی کۆمپانیای گازی دەوڵەتی ئۆکراینا (نافتۆگاز) رایگەیاند، زیان بەر تۆڕەکەی کەوتووە. 

 

سێرگی کۆرێتسکی، بەڕێوەبەری جێبەجێکاری نافتۆگاز گوتی: "ئەم هێرشە تیرۆریستییە شێتانەیە تەنیا یەک ئامانجی هەیە: بێبەشکردنی ئۆکراینییەکان لە گاز، گەرما و رووناکی."

 

سوپای رووسیا بڵاویکردەوە، هێرشی کردووەتە سەر "کۆمەڵگەی سەربازی-پیشەسازیی ئۆکراینا و دامەزراوەکانی ژێرخانی گاز و وزە."

 

هێرشەکانی رووسیا هاوپەیمانە ئەورووپییەکانی ئۆکرایناشیان نیگەران کردووە. هێزە چەکدارەکانی پۆڵەندا رایگەیاند، فڕۆکەکانیان جووڵەپێکردوون و بۆ پاراستنی ئاسمانی وڵاتەکە، بەرگریی زەوینییان خستووەتە ئامادەباشییەوە.