بەهۆی 'خواردنەوەی کحولیی خراپەوە' لە تونس چوار کەس گیانیان لەدەستدا

 

 

رۆژی یەکشەممە، 7-1-2024، بەرپرسێکی تەندروستیی تونس رایگەیاند، بەهۆی خوارنەوەی کحولیی بێکوالێتی و خراپەوە لە شاری مەدەنین لە باشووری توونس چوار کەس گیانیان لەدەستدا و 40 کەسیش ژەهراویبوون.

 

فەتحی بەکوش، گوتەبێژی دادگەی مەدەنین گوتی، "پەڕاوی لێکۆڵینەوە کراوەتەوە و ئەو بازرگانەی کە ئەو کحولەشی هاوردە کردووە دەستگیرکراوە."

 

بەگوێرەی بەکوش، کحولەکە رەوانەی تاقیگە کراوە و "چاوەڕێی ئەنجامەکانین. بەشێک لەو 40 کەسەی ژەهراویبوونە بەهۆی خراپیی تەندروستییانەوە بەرەو شاری تونسی پایتەختەوە نێردراون."

 

ئەوە یەکەمجار نییە ژەهراویبوون و مردن بەهۆی کحولی بێکوالیتی و خراپەوە تۆماربکرێت.

 

ساڵی 2021، بەرپرسانی تەندروستیی تونس رایانگەیاند، لە شاری قەسرەین لە رۆژئاوای وڵاتەکە بەهۆی کحولی خراپەوە، پێنج کەس گیانیان لەدەستدا و 25ـی دیکەش ژەهراویبوون.

 

لە ئایاری 2020ـیش لە شاری قەیرەوان لانیکەم 39 کەس ژەهراویبوون و شەش کەسیان گیانیان لەدەستدا، ئەمەش دوای ئەوەی جۆرە کحولێکیان خواردبۆوە کە مادەی میسانۆلی تێدابوو.

 

میسانۆل باوترین جۆری مادەیە کە لەو کحولانە دەکرێت و رێژەی ژەهراویبوونی بەرزە و بۆ دابەزاندنی نرخی کحولەکە لە بری مادەی ئیسانۆل بەکاردێت. 

 

بەکارهێنانی ئەو جۆرە کحولانە کە لە ماڵان دروستدەکرێن لە توونس بەتایبەت لەلایەن چینی هەژاران زۆر بەربڵاوە.