ئەڵمانیا سێ هەزار پۆلیسی زیاتر دەنێرێتە سنوورەکان بۆ رێگری لە پەڕینەوەی کۆچبەران

 

رۆژی چوارشەممە 07-05-2025 لە یەکەم رۆژی دەستبەکاربوونی کابینەی نوێدا، حکومەتی ئەڵمانیا بڕیارێکی لەبارەی کۆچبەران و پەناخوازان دەرکرد. 

 

ئەلیکساندەر دۆبرینت، وەزیری ناوخۆی وڵاتەکە فەرمانی کرد سێ هەزار پۆلیسی زیاتر رەوانەی سنوورەکانی وڵاتەکەی بکرێن و بەو جۆرەش ژمارەی پۆلیس لە سنوور بگەیێنێتە 14 هەزار کەس. ئەم هەنگاوە بۆ رێگریکردنە لە پەڕینەوەی کۆچبەرانی نایاسایی بۆ نێو ئەڵمانیا.

 

دۆبرینت گوتی: "ئەمە بۆ دڵنیابوونەوەیە لەوەی پۆلیس توانای رێگەگرتنی لە کۆچبەران هەبێت."

 

لە ساڵی 2015 دا ئەڵمانیا بڕیارێکی دەرکرد و دەرگەی بۆ کۆچبەران کردەوە. ئەلیکساندەر دۆبرینت ئەو بڕیارەی راگرت.

 

وەزیری ناوخۆی وڵاتەکە فەرمانی کردووە، داواکاریی بەشێکی زۆری پەناخوازان رەتبکرێتەوە، بەڵام بڕیارەکە منداڵ و ژنانی دووگیان ناگرێتەوە. 

 

پێشتر مێرتس کە سەرکردەی هاوپەیمانیی CDU/CSUـە، بەڵێنی دابوو ژمارەی وەرگرتنی کۆچبەران و پەناخوازان کەمبکاتەوە و سنوورداری بکات.

 

دوای بڕیارە نوێکەی دۆبرینت، هەر پۆلیسێکی سنوور نزیکەی 12 کاژێر ئەرکی دەکەوێتە ئەستۆ تاوەکو یاساکانی سنوور بەتەواوی جێبەجێ دەکرێن.

 

ئەندریاس رۆسکۆف، بەڕێوەبەری پۆلیسی فیدراڵی رایگەیاند: "لەسەر فەرمانی وەزیری ناوخۆ، بڵاوەپێکردنی پۆلیس دەستی پێکردووە."

 

پێش راگەیاندنی کابینەی حکومەت، هاوپەیمانییەکەی مێرتس و پارتی سۆسیال دیموکرات رێککەوتنی هاوپەیمانێتییان واژۆکرد، کە وەکو نەخشەڕێگەی سیاسیی چوار ساڵی داهاتووی ئەڵمانیایە. 

 

لە رێککەوتنەکەدا هاتووە، ئەگەر کەسێک گەیشتە ئەڵمانیا و بەڵگەنامەی یاسایی پێنەبوو، رێگەی پێنادرێت بچێتە ژوورەوە. ئەو بڕیارە ئەوانەش دەگرێتەوە کە داوکاریی پەناخوازییان پێشکێشکردووە. هەرچەندە بەشی دووەمی بڕیارەکە لەبارەی پەناخوازان، نیگەرانیی لای بەشێک لە ئەندامانی SPD دروستکردووە و دەڵێن: "ئەمە لەگەڵ یاساکانی یەکێتیی ئەورووپا یەکناگرێتەوە."

 

رێککەوتنەکە هەروەها ئاماژەی بەوەداوە، لە سنوورەکانی ئەڵمانیا پشکنینی چڕتر بکرێت. پۆلیسی ئەڵمانیا پێشتر داوای زیادکردنی ژمارەی هێزەکانیان کردبوو بەهۆی ئەوەی "ژمارەی پۆلیسی سنوور کەمە."