پێنج کەس بە تۆمەتی بەقاچاخبردنی کۆچبەری سووریایی بۆ ئەورووپا دەستگیرکران

 

رۆژی پێنجشەممە، 7ـی ئابی 2025، پۆلیسی میونشن و داواکارانی گشتی لە شارۆچکەی ڤایدنی هەرێمی باڤاریا لە راگەیێندراوێکدا ئاماژەیان بەوە کرد، تۆمەتبارەکان هاووڵاتیی سووریان و تەمەنیان لەنێوان 26 بۆ 37 ساڵیدایە.

 

سووریاییەکان تۆمەتبارن بەوەی لە رێگەی وڵاتانی بالکانەوە، لە ساڵی 2021ـەوە، لانیکەم 500 کەسیان بردووەتەوە ئەڵمانیا و وڵاتانی دیکەی رۆژئاوای ئەورووپا. 

 

لێکۆڵەرانی ئەڵمانیا پێیانوایە ژمارەی راستەقینەی ئەوانەی تۆمەتبارەکان بەقاچاخ بردوویانن زۆر لەوە زیاترە. 

 

لە راگەیێندراوەکەی پۆلیسی میونشن و داواکارانی گشتیی هاتووە، "رێکخراوەکە خۆی دەڵێت: لە ساڵی 2022 دا رۆژانە تاوەکو 480 کەسی بۆ ئەڵمانیا و ئەورووپا بە قاچاخ بردووە".

 

باندەکە بۆ هەر کەسێک بڕی 4,500 یۆرۆ (5,230 دۆلار)ی وەرگرتووە و لەنێوان ساڵانی 2022 و 2025 لانیکەم 1.4 ملیۆن یۆرۆی قازانج کردووە.

 

بەرپرسانی ئەڵمانیا رایانگەیاند، ئۆپەراسیۆنەکەی پۆلیس کە رۆژی چوارشەممە ئەنجامدراوە، بە هاوئاهەنگی لەگەڵ دەزگاکانی دژەتاوانی یەکێتیی ئەورووپا "یورۆپۆڵ" و "یورۆجەست" بووە.

 

پۆلیسی ئەڵمانیا و هۆڵەندا پشکنینیان بۆ سێ باڵەخانە لە شارەکانی دۆرتمۆند و بۆخووم لە ئەڵمانیا و خانوویەک لە شاری هاوتن لە هۆڵەندا کردووە.

 

بەرپرسانی ئەڵمانیا ئاماژە بەوەش دەکەن، لە ئۆپەراسیۆنەکەدا، "دەست بەسەر بەڵگەی زۆردا گیراوە، لەوانە مۆبایلی زیرەک و ئەو ئۆتۆمبێلانەی لە ئەنجامدانی تاوانەکەدا بەکارهاتوون، هەروەها بڕێکی کەم مادەی هۆشبەر".