ترەمپ: دەمەوێت لە کاتی گونجاودا سزا تووندەکان لەسەر ئێران هەڵبگرم

 

 

لە سەرەتای ئێوارە خوانێکدا لەگەڵ بنیامین نەتەنیاهوو، سەرۆکوەزیرانی ئیسرائیل، ترەمپ بە رۆژنامەڤانانی گوت، هەنگاوی ئەمدواییەی بۆ هەڵگرتنی سزاکانی ئەمریکا لەسەر سووریا، یارمەتیی دیمەشق دەدات بۆ ئەوەی بەرەوپێش بچێت و هیوای خواست ئێرانیش هەنگاوێکی هاوشێوە بنێت.

 

ترەمپ گوتی: "دەمەوێت بتوانم لە کاتی گونجاودا ئەو سزایانە هەڵبگرم و دەرفەتێکیان پێبدەم بۆ ئاوەدانکردنەوە، چونکە حەزدەکەم ببینم ئێران بە شێوەیەکی ئاشتییانە خۆی بنیات دەنێتەوە، نەک بەردەوام بن لە گوتنەوەی دروشمی وەک: 'مەرگ بۆ ئەمریکا' و 'مەرگ بۆ ئیسرائیل'، وەک ئەوەی پێشتر دەیانکرد."

 

سەرۆکی ئەمریکا هەروەها گوتی: "هیوادارم شەڕی نێوان ئیسرائیل و ئێران کۆتایی هاتبێت و دەمەوێت لە کاتی گونجاودا سزاکان لەسەر تاران هەڵبگرم."

 

ترەمپ هیوای خواست جارێکی دیکە پێویست نەکات وڵاتەکەی هێرش بکاتەوە سەر ئێران، وەک ئەوەی مانگی رابردوو کردی کاتێک هێرشی کردە سەر دامەزراوە ئەتۆمییەکانی.

 

نەتەنیاهوو لە وەڵامی پرسیارێکدا سەبارەت بە گۆڕینی حکومەتی ئێران گوتی: "ئەوە پەیوەستە بە گەلی ئێرانەوە."

 

هەر لەم بارەیەوە ستیڤ ویتکۆف، نێردەی ئەمریکا بۆ رۆژهەڵاتی نێوەڕاست رایگەیاند، کۆبوونەوە لەگەڵ ئێران "هەفتەی داهاتوو یان لەو دەوروبەرەدا دەکرێت."

 

مەسعود پزیشکیان، سەرۆککۆماری ئێران، لە چاوپێکەوتنێکدا کە رۆژی دووشەممە بڵاوکرایەوە، رایگەیاند، پێیوایە تاران دەتوانێت لە رێگەی گفتوگۆیەوە کێشەکانی لەگەڵ ئەمریکا چارەسەر بکات، بەڵام بنیاتنانی متمانە دوای هێرشەکانی ئەمریکا و ئیسرائیل بۆ سەر ئێران، زەحمەت بووە.

 

پزیشکیان بە تاکەر کارلسن، پێشکێشکاری ئەمریکی گوت: "پێموایە دەتوانین بە ئاسانی لە رێگەی دانوستاندن و گفتوگۆوە ناکۆکی و کێشەکانمان لەگەڵ ئەمریکا چارەسەر بکەین."

 

پزیشکیان هانی ترەمپی دا کە تێکەڵی شەڕێک نەبێت لەگەڵ ئێران کە نەتەنیاهوو رای دەکێشێتە نێوی و گوتی: "سەرۆک ترەمپ دەتوانێت ناوچەکە بەرەو ئاشتی و داهاتوویەکی گەشتر ببات و سنوورێک بۆ ئیسرائیل دابنێت. یان بکەوێتە نێو چاڵێکەوە... چاڵێکی بێ بن... یان زۆنگاوێک... بۆیە هەڵبژاردنی رێگەکە لەسەر شانی سەرۆکی ویلایەتە یەکگرتووەکانی ئەمریکایە."