فەرەنسا پێشوازی لە رێککەوتنی ئاگربەستی نێوان دیمەشق و هەسەدە دەکات

 

رۆژی چوارشەممە 08-10-2025 وەزارەتی دەرەوەی فەرەنسا لە راگەیێنراوێکدا رایگەیاند: "لەسەر ئەم بنەمایە، دەبێت دیالۆگ بەردەوام بێت بۆ دڵنیابوون لە جێبەجێکردنی رێککەوتنی 10ـی ئاداری 2025 بە هەموو رەهەندەکانییەوە. ئەم رێککەوتنە بۆ سەقامگیریی سووریا خاڵێکی بنەڕەتییە."

 

لە کۆتایی راگەیێنراوەکەدا هاتووە: "فەرەنسا، شانبەشانی هاوبەشەکانی، بە تەواوی ئامادەی بەشداریکردنی ئەم رێککەوتنەیە."

 

رێککەوتنە زارەکییەکە دوای گرژی و پێکدادانەکانی گەڕەکە کوردنشینەکانی حەلەب دێت. شەوی دووشەممە 06ـی تشرینی یەکەم، هێزەکانی حکومەتی کاتیی سووریا رێگەی گەڕەکەکانی ئەشرەفییە و شێخ مەقسوودیان داخست، کە بووە هۆی کوژرانی کەسێکی سڤیل و برینداربوونی 50 کەسی دیکە.

 

دوای ئەم گرژییانە، رۆژی سێشەممە شاندێکی باڵای بەڕێوەبەرایەتیی خۆسەر بە سەرۆکایەتیی مەزڵووم عەبدی، فەرماندەی گشتیی هەسەدە گەیشتە دیمەشق و لەگەڵ ئەحمەد شەرع، سەرۆکی سووریا کۆبووەوە.

 

 

- ئاگربەستی دەستبەجێ و سەرتاسەری: لە باکوور و رۆژهەڵاتی سووریا و حەلەب.

 

- یەکخستنی هێزە سەربازییەکان: یەکخستنی هێزەکانی سووریای دیموکرات و هێزەکانی ئاسایشی ناوخۆ بۆ دروستکردنی "سوپایەکی رێکخراو و کارا."

 

- هەموارکردنەوەی دەستوور: بە شێوەیەک کە نوێنەرایەتیی هەموو دانیشتووانەکەی بکات.

 

- گەڕانەوەی ئاوارەکان و شەڕی دژی تیرۆر.

 

بەڕێوەبەرایەتیی خۆسەر سوپاسی فەرەنسا و فەرماندەیی ناوەندیی ئەمریکای کرد بۆ "پشتیوانییە بنەڕەتییەکەیان لەم دیالۆگەدا."