تەقینەوەی کارگەیەکی تەقەمەنی لەنزیک ناشڤیڵی ئەمریکا بووە هۆی کوژرانی لانیکەم دوو کەس

 

 

دەزگا ئەمنییەکانی ویلایەتی تێنسی پشتڕاستیان کردەوە، تەقینەوەکە "گەورە" بووە و لە کۆمپانیای ئەکیورت ئینێرجێتیک سیستمز لە شاری هیکمان لە ویلایەتی تێنسی روویداوە.

 

بەگوێرەی پۆلیسی شارەکە، "چەندین" کەس گیانیان لەدەستداوە.

 

بەرپرسێک لە بەڕێوەبەرایەتیی فریاکەوتنی ناوچەی هەمفری رایگەیاند، لانیکەم 19 کەس بێسەروشوێنن و چەندینی دیکەش لە نەخۆشخانە چارەسەر وەردەگرن.

 

تیمە فریاگوزارییەکان لە شوێنی تەقینەوەکەن و سەرقاڵی کۆنترۆڵکردنی دۆخەکەن.

 

دامودەزگەکان داوایان لە خەڵک کردووە لە ناوچەکە دووربکەونەوە بۆ ئەوەی رێگە بدەن تیمەکانی فریاکەوتن کارەکانیان بکەن؛ هەروەها داوا لە ئەندامانی خێزانی کوژراوان و بێسەروشوێنبووان کراوە بۆ وەرگرتنی زانیاریی زیاتر، سەردانیان بکەن.

 

بەگوێرەی ماڵپەڕی فەرمیی کۆمپانیاکە، ئەکیورت ئینێرجێتیک سیستمز لە ساڵی 1980 دامەزراوە و "تایبەتە بە پەرەپێدان، بەرهەمهێنان، مامەڵەکردن و کۆگاکردنی بەرهەمە تەقەمەنییەکان کە لە هەردوو کەرتی بەرگری و بازرگانی بەکاردەهێنرێن."