پەرلەمانتارێکی ئەورووپا: هەڵوەشاندنەوەی هێزە کوردییەکان بێباکییەکی ستراتیژییە

 

رۆژی سێشەممە 11-02-2026 دانیاڵ ئەتارد لە گوتارەکەیدا ئاماژەی بەوە کرد، کاتێک رێکخراوی داعش لە پێشڕەویدا بوو، زۆر لە وڵاتان چاویان لە راستییەکان نوقاند، بەڵام هێزە کوردییەکان نەوەستان و خوێنیان رشت. ئەتارد گوتی: "کوردەکان تەنیا بۆ پاراستنی خاکی خۆیان نەجەنگان، بەڵکو بۆ پاراستنی ئاسایشی ئێمەش لە ئەورووپا گیانیان فیدا کرد."

 

ئەتارد بە تووندی رەخنەی لەو هەوڵانە گرت کە بۆ هەڵوەشاندنەوەی ئەو هێزانە دەدرێن کە داعشیان تێکشکاند و رایگەیاند، لە رۆژئاڤا مۆدێلێکی دەگمەن دروست بوو، کە تێیدا ژنان سەرکردایەتییان دەکرد، پێکهاتەکان پێکەوە دەژیان و بەڕێوەبەریی خۆجێیی جێگەی پشێوی و تووندوتیژیی تائیفی گرتبووەوە.

 

ئەو پەرلەمانتارە هێرشی تووندی کردە سەر کۆمیسیۆنی ئەورووپا و گوتی: "کۆمیسیۆن بەڵێنی بەخشینی 600 ملیۆن یۆرۆی بە دیمەشق دا، بەبێ ئەوەی هیچ مەرجێکی راستەقینە و گەرەنتییەکی روون بۆ پاراستنی مافەکان دابنێت."

 

 ئەتارد ئەم جۆرە سیاسەتەی بە "خەون بینین" وەسفکرد و داوای کرد، هەر پشتگیرییەک بۆ سووریا دەبێت مەرجدار بێت بە پاراستنی مافەکانی کورد، دابینکردنی گەرەنتیی ئەمنی و چاودێریی مافەکانی مرۆڤ.

 

ئەو ئەندامەی پەرلەمانی ئەورووپا لە کۆتایی قسەکانیدا گوتی: "ئەورووپا دەبێت لە ساویلکەیی دەربچێت، چونکە سەقامگیری بەبێ دابینکردنی مافەکان، تەنیا وەهمێکە."

 

ئەم هەڵوێستەی دانیاڵ ئەتارد لە چوارچێوەی دیبەیتێکی فراواندا بوو کە هۆڵی پەرلەمانی ئەورووپای لە ستراسبۆرگ هەژاند، ئەوەش دوای ئەوەی هێزەکانی حکومەتی کاتیی سووریا لە کانوونی دووەمی 2026دا هێرشیان کردە سەر ناوچەکانی ژێر دەسەڵاتی هێزەکانی سووریای دیموکرات (هەسەدە).

 

لەو دانیشتنەدا، ئەڤین ئینجیر، ئەندام پەرلەمانی ئەورووپا بە جلوبەرگی کوردی و ئاڵای کوردستانەوە دەرکەوت و بە درووشمی "ژن، ژیان، ئازادی" دەستی پێکرد. ئینجیر جەختی کردەوە کە کورد شتێکی دەگمەنیان لەنێو جەرگەی شەڕدا دروست کرد، ئەویش پێکەوەژیانی کورد، عەرەب و کریستیان بوو.

 

عەبیر سەهلانی، پەرلەمانتارێکی دیکەی ئەورووپا، رەخنەی لەو لایەنانە گرت کە دەیانەوێت دۆسیەی سووریا تەنیا وەک پرسی کۆچبەران نیشان بدەن. سەهلانی ئاماژەی بەوە کرد، "تیرۆریستەکان تەنانەت دوای مردنیش کەزیی ژنی کورد دەبڕن" و داوای کرد گەمارۆی سەر کۆبانی دەستبەجێ هەڵبگیرێت.

 

پەرلەمانتاران ڤیۆلا ڤۆن کرامۆن و تێس رۆیتن تیشکیان خستە سەر رەهەندە مرۆییەکانی جەنگەکە و رایانگەیاند، زیاتر لە 170,000 کەس ئاوارە بوون و منداڵان بەهۆی سەرما و برسییەتییەوە گیان لەدەست دەدەن. کرامۆن هۆشداریی دا، تێکچوونی سیستمی ئەمنی دەبێتە هۆی هەڵاتنی چەکدارانی داعش لە کەمپەکانی هۆڵ و رۆژ، کە ئەمەش راستەوخۆ کاریگەریی لەسەر ئاسایشی ئەورووپا دەبێت.

 

دانیشتنەکە بەو کۆدەنگییە کۆتایی هات کە پەرلەمانی ئەورووپا رۆژی پێنجشەممە 12ی شوبات، دەنگ لەسەر پڕۆژەبڕیارێک بدات بۆ داواکردنی ئاگربەستێکی بەردەوام و گەرەنتیکردنی مافە دەستوورییەکانی کورد لەنێو دەوڵەتی نوێی سووریادا.

 

دەقی قسەکانی دانیاڵ ئەتارد، ئەندامی پەرلەمانی ئەورووپا

 

"کاتێک داعش لە پێشڕەویدا بوو، زۆرکەس چاویان لێ نوقاند، بەڵام هێزە کوردییەکان وایان نەکرد. ئەوان جەنگان، خوێنیان بەخشی و گیانیان سپارد؛ نەک تەنیا بۆ خاکی خۆیان، بەڵکو بۆ ئاسایشی ئێمەش لێرە لە ئەورووپا.

 

 ئەمڕۆ، رێک ئەو هێزانەی داعشیان تێکشکاند، رووبەڕووی مەترسیی هەڵوەشاندنەوە دەبنەوە. ئەمە نەک هەر لە رووی ئەخلاقییەوە هەڵەیە، بەڵکو بێباکییەکی ستراتیژیشە. لە رۆژئاڤا شتێکی دەگمەنمان لە سووریا و ناوچەکەشدا بینی: ژنان سەرکردایەتییان دەکرد، پێکهاتەکان پێکەوە دەژیان، حوکمی خۆجێیی هەبوو لە جیاتی پشێویی تائیفی. ئەی وەڵامی ئێمە چی بوو؟ کۆمیسیۆنی ئەورووپا بەڵێنی 600 ملیۆن یۆرۆی بە دیمەشق دا، بەبێ هیچ مەرجێکی راستەقینە، بەبێ هیچ گەرەنتییەکی روونی مافەکان و بەبێ هیچ لێپێچینەوەیەکی راستەقینە.

 

 بە بڕوای من ئەمە سیاسەتی دەرەوە نییە، ئەمە تەنیا خەون و خەیاڵە. با روون بین: پشتگیریکردنی سووریا باشە، بەڵام دەبێت بە واتای پاراستنی مافەکانی کورد، دابینکردنی گەرەنتیی ئەمنی و مەرجی مافەکانی مرۆڤیش بێت. ئەگەر نا، ئێمە ناپاکی لەوانە دەکەین کە داعشیان تێکشکاند، هاوکات ئاسایشی خۆشمان لاواز دەکەین. پێویستە ئەورووپا لە ساویلکەیی دەربچێت. سەقامگیری بەبێ ماف، تەنیا وەهمێکە. سوپاس."