ترەمپ بۆ رووداو: ئەو بەرپرسانەی دەڵێن چەکمان بە کورد نەداوە هەڵەن

 

رۆژی سێشەممە، 12ـی ئایاری 2026، دۆناڵد ترەمپ لە کاتی جێهێشتنی کۆشکی سپی و بەڕێکەوتنی بەرەو چین وەڵامی پرسیارێکی دیار کوردە، بەرپرسی نووسینگەی رووداوی واشنتنی دایەوە. 

 

پەیامنێری رووداو لە دۆناڵد ترەمپی پرسی: "جەنابی سەرۆک، دوێنێ گوتت چەکت داوە بە کورد و بۆ خۆیان هەڵیانگرتووە، بەڵام بەرپرسێکی سەربازیی ئەمریکا دەڵێت چەک بە کورد نەدراوە و لایەنە کوردییەکانیش رەتی دەکەنەوە چەکیان وەرگرتبێت؟"

 

دۆناڵد ترەمپ بە رووداوی راگەیاند: "بەرپرسەکان هەڵەن."

 

رۆژی دووشەممە، 11ـی ئایاری 2026، دۆناڵد ترەمپ لە کۆشکی سپی سەبارەت بە ناردنی چەک بۆ خۆپێشاندەرانی ئێران گوتی، خەڵک دەیانەوێ بڕژێنە سەر شەقامەکان، بەڵام هیچ چەکێکیان نییە و پێیانوابوو کوردەکان چەکیان پێدەدەن، "بەڵام ئەوان نائومێدیان کردین. کوردەکان تەنیا دەبەن، دەبەن و دەبەن."

 

ترەمپ لە سەرەتای دەستپێکردنی جەنگی ئێرانەوە چەندین جار رەخنەی گرتووە لەوەی کە چەکیان بۆ خۆپێشاندەرانی ئێران ناردووە، بەڵام کورد رادەستی خۆپێشاندەرانی ئێرانی نەکردووە. هێزەکانی رۆژهەڵاتی کوردستان دەڵێن، هیچ چەکێکان بەدەست نەگەیشتووە.