زیندانییەک لە فەرەنسا خۆی لەنێو جانتای هاوڕێ ئازادکراوەکەی شاردەوە و هەڵات

 

 

بەگوێرەی بەرپرسانی فەرەنسا، رۆژی 11-07-2025، ئەو پیاوە لە زیندانی لیۆن-کۆرباس هەڵات.

 

فەرمانگەی زیندانەکانی فەرەنسا رایگەیاند: "زیندانییەکە سوودی لە ئازادکردنی هاوڕێکەی وەرگرتووە و خۆی لە جانتاکەیدا شاردووەتەوە و بەو شێوەیە هەڵاتووە".

 

پۆلیس لێکۆڵینەوەی لە رووداوەکە دەستپێکردووە.

 

ئەو زیندانییە هەڵاتووە چەند سزایەکی بەسەردا سەپێندرابوو و لە دۆسیەیەکی دیکەیشدا کە پەیوەندی بە تاوانی رێکخراوەوە هەبوو، لێکۆڵینەوەی لەگەڵ دەکرا.

 

مانگی رابردوو، سەندیکای پارێزەرانی لیۆن نیگەرانیی خۆی لە قەرەباڵخیی زیندانی لیۆن-کۆرباس دەربڕی. 

 

بە گوێرەی ئاماری نافەرمی، نزیکەی 1,200 کەس لەو زیندانەدا راگیراون، لە کاتێکدا زیندانەکە تەنیا جێگەی 678 کەسی تێدا دەبێتەوە.