دادگەیەکی پاریس سزای شەش مانگ بەندکردنی بۆ سەرۆکی پێشووتری فەرەنسا دەرکرد

 

رۆژی چوارشەممە، 14-02-2024، دادگەیەکی تێهەڵچوونەوەی شاری پاریس سزای شەش مانگ بەندکردنی بۆ نیکۆلای سارکۆزی، سەرۆکی پێشووتری فەرەنسا دەرکرد، بەهۆی پارە خەرجکردنی نایاسایی لە بانگەشەی هەڵبژاردنی 2012.

 

سەرەتا سزاکە یەک ساڵ بەندکردن بوو، بەڵام دادگەکە بۆ شەش مانگ بەندکردن کەمیکردەوە و شەش مانگەکەی دیکەش سزای بەندکردن لە ماڵەوە دەبێت.

 

بەگوێرەی دادگەکە: "سارکۆزی لە بانگەشەی هەڵبژاردنی سەرۆکایەتیی 2012ـدا پارەیەکی زۆری لە بانگەشەدا خەرجکردووە لەکاتێکدا بۆی هەبوو تەنیا 22.5 ملیۆن دۆلار خەرجبکات، بەڵام ئەو نزیکەی دوو هێندەی ئەو پارەیەی لە بانگەشەکانی خۆیدا بەکارهێناوە و دواتر کۆمپانیایەکی گرتووە بۆ داپۆشینی ئەو بڕە پارەیەی بەکاریهێناوە."

 

بەگشتی ئەمجۆرە سزایانە لە فەرەنسا لە ماڵەوە جێبەجێ دەکرێن و کەسی سزادراو تاگێکی ئەلیکترۆنی پێوە دەلکێندرێ کە شوێنەکەی لەلای پۆلیس دیاردەکات؛ یان دەتوانێت بە پێدانی پارەی پێبژاردن (کەفالەت) سزاکەی خۆی تەواو بکات.

 

ڤینسنت دێزری، پارێزەری سارکۆزی رایگەیاند: "بەڕێز نیکۆلای سارکۆزی بە تەواوی بێتاوانە و بڕیاریداوە لە باڵاترین دادگەی فەرەنسا تانە لەو بڕیارە بدات."

 

سەرۆکی پێشووتری فەرەنسا لە کاتی بڕیارەکەدا لە دادگە ئامادەبوو، جگە لە زەردەخەنە هیچ کاردانەوەیەکی دیکەی نەبوو و دوای تەواوبوونی دادگاییەکە بەپەلە و بێ هیچ لێدوانێک دادگەی بەجێهێشت.

 

بەهۆی ئەوەی سارکۆزی بڕیاریداوە تانە لە بڕیارەکە بدات، تاوەکو یەکلابوونەوەی تانەکە، سزاکە جێبەجێ ناکرێت.

 

پێشتر سارکۆزی لە چەند دۆسیەیەکی دیکەی دادگەدا ناوی هێنراوە. لە 2023 دادگە سزای بەندکردن لە ماڵەوەی بەسەردا سەپاند، بە تۆمەتی پێدانی بەرتیل بە دادوەرێکی فەرەنسی لە 2014.

 

بڕیارە ساڵی داهاتوو سارکۆزی لەسەر دۆسیەی وەرگرتنی پارەی نایاسایی لە موعەممەر قەززافی، سەرۆکی پێشووی لیبیا لە 2007 دادگایی بکرێت.

 

نیکۆلا پاول ستێفانی سارکۆزی، تەمەن 69 ساڵ، لە 2007 تاوەکو 2012 سەرۆکی فەرەنسا بوو و یەکێک بوو لەو سەرۆکانەی کە دژی کۆچبەران بوو. لە ساڵی 2012 نەیتوانی دووبارە ببێتەوە سەرۆک و فرانسوا هۆڵاندی رکابەری بووە سەرۆکی نوێی فەرەنسا.

 

لەماوەی سەرۆکایەتیی سارکۆزیدا چەند جەنگێک دروستبوون کە لە بەشێکیان سوپا و حکومەتی فەرەنسا بەشدارییان تێداکرد، لەوانەش: شەڕی ئەفغانستان کە لە 2001ـەوە دەستی پێکردبوو، سارکۆزی چەندین سەربازی فەرەنسی لە ئەفغانستان جێگیرکرد؛ شەڕی نێوان رووسیا و جیۆرجیا (2008) سارکۆزی رۆڵێکی گرنگی گێڕا لە راگەیاندنی ئاگربەست لەنێوان دوو لایەنەکە و لەسەر ئاستی نێودەوڵەتی ستایشی کرا؛ شەڕی نێوخۆی لیبیا (2011) فەرەنسا هێرشی ئاسمانیی کردە سەر هێزەکانی قەزافی و شەڕی نێوخۆی کۆتدیڤوار (2010-2011) کە تێیدا سەربازانی سوپای فەرەنسا بەشدارییان کرد.