نوێنەری تورکیا لە UN بۆ رووداو: لە سووریایەکی یەکگرتوودا شوێن بۆ پێکهاتەی هاوتەریب نابێتەوە

 

 

دوای بەشداریکردنی لە کۆبوونەوەیەکی تایبەتی ئەنجوومەنی ئاسایشی نەتەوە یەکگرتووەکان سەبارەت بە دۆخی سووریا، ئەحمەد یڵدز لە هەڤپەیڤینێکی تایبەتدا لەگەڵ رووداو رایگەیاند، زۆربەی هەرە زۆری ئەندامانی ئەنجوومەنی ئاسایش گەشبینن بەو پێشکەوتنانەی لە سووریا بەدیهاتوون. یڵدز گوتی: "کەشی کۆبوونەوەکە زۆر ئەرێنی بوو، ئەندامان دەستخۆشییان لە هەنگاوەکانی سووریا کرد بەرەو ئاوەدانبوونەوە و سەقامگیری."

 

 

سەبارەت بە هەڵوێستی ئەنقەرە بەرامبەر گفتوگۆکانی نێوان هێزەکانی سووریای دیموکرات (هەسەدە) و حکومەتی سووریا، دیپلۆماتەکەی تورکیا ئاماژەی بەوە کرد کە وڵاتەکەی لە نزیکەوە چاودێریی دۆخەکە دەکات. ئەحمەد یڵدز گوتی: "وەک لە کۆبوونەوەکەشدا ئاماژەم پێدا، لە سووریایەکی یەکگرتوودا هیچ شوێنێک بۆ دوو پێکهاتەی هاوتەریب نییە. پێویستە هەموو پێکهاتەکان لە چوارچێوەی سیستمێکی یەکگرتوودا یەکبخرێن."

 

ئەحمەد یڵدز ئاشکرای کرد کە تورکیا و سووریا دەتوانن پێکەوە کار بکەن بۆ پەرەپێدانی پەیوەندییە ناوچەییەکان، بووژانەوەی ئابووری و رووبەڕووبوونەوەی "دەستدرێژییەکانی ئیسرائیل" لە ناوچەکەدا.

 

 

 

 

ئەحمەد یڵدز: بەڵێ، تا ئەو جێگەیەی من بیستبێتم، کەشێکی زۆر ئەرێنی بوو. زۆربەی هەرە زۆری ئەندامانی ئەنجوومەن دەستخۆشییان لە پێشکەوتنەکانی سووریا و هەنگاونان بەرەو پێشەوە کرد، هەروەها هیوا و چاوەڕوانییەکانی خۆیان بۆ ناوچەیەکی سەقامگیر و سووریایەکی ئاوەدانبووەوە دەربڕی.

 

 

ئەحمەد یڵدز: ناتوانم بچمە نێو وردەکاریی ئەم بابەتەوە، چونکە سووریا وڵاتێکی دراوسێیە و ئێمە لە پەیوەندیی نزیکداین لەگەڵیان. ئەوەی لە کۆبوونەوەکەدا گوتم، وەک چۆن لەوێش ئاماژەم پێدا، ئەوەیە کە لە سووریایەکی یەکگرتوودا هیچ شوێنێک بۆ دوو پێکهاتەی هاوتەریب نییە. دەبێت ئەو رێککەوتنەی لەنێوان هەسەدە و حکومەتی سووریا هەیە بە تەواوی جێبەجێ بکرێ و هەموو پێکهاتەکان لە چوارچێوەی سیستمێکی یەکگرتوودا یەکبخرێن.

 

 

ئەحمەد یڵدز: هیچ سەرنجێکم لەسەر ئەوە نییە، بەڵام سەبارەت بە سووریا، ئێمە بە شێوەیەکی باش و لە نزیکەوە هاوئاهەنگی لەگەڵ سەرکردایەتی و دەسەڵاتدارانی سووریا دەکەین. زۆر شت لە سووریا هەن کە دەکرێ لەگەڵ سووریا بکرێن بۆ پەرەپێدانی پەیوەندییە ناوچەییەکان، بۆ بووژانەوەی ئابووری، بۆ کارکردن دژی دەستدرێژییەکانی ئیسرائیل لە ناوچەکەدا. هەر بۆیە لێدوان لەسەر پرسە ناوخۆییەکانی سووریا نادەم.