ترەمپ و پووتین کۆبوونەوەکەیان بە "بەرهەمدار" و "ئەرێنی" ناو دەبەن

 

دوای کۆتاییهاتنی لووتکەکەیان لە ئەلاسکا، لە کۆنفرانسێکی رۆژنامەڤانیی هاوبەشدا، پووتین گوتی: "دانوستاندنەکانمان لە کەشێکی بونیادنەر و پڕ لە رێزلەیەکگرتندا بەڕێوەچوو. زۆر تێروتەسەل و سوودبەخش بوون."

 

هاوکات ترەمپ گوتی: "کۆبوونەوەیەکی زۆر بەرهەمدارمان هەبوو و رێککەوتن لەسەر زۆر خاڵ کرا. ژمارەیەکی زۆر کەمیان ماون" رێککەوتنیان لەسەر بکرێت. 

 

ترەمپ گوتیشی: "ئێمە [لەسەر ئەو خاڵانە] نەگەیشتینە رێککەوتن، بەڵام دەرفەتێکی زۆر باشمان هەیە پێی بگەین."

 

سەرۆکی رووسیا هیوای خواست "ئەو لێکتێگەیشتنەی دروستبووە رێگە بۆ ئاشتی لە ئۆکراینا خۆش بکات."

 

هەروەها داوای کرد کە ئۆکراینا و ئەورووپا "هیچ بەربەستێک بۆ ئاشتی" دروست نەکەن. 

 

ترەمپ ئاماژەی بەوە کرد کە دوای ئەم کۆبوونەوەیە، بە تەلەفۆن قسە لەگەڵ سەرکردەکانی ئەورووپا و ئۆکراینا دەکات، هەروەها بە هاوتا رووسیەکەی گوت کە رەنگە لە ماوەیەکی نزیکدا یەکدی ببیننەوە. 

 

پووتین هیوای خواست جاری داهاتو و لە مۆسکۆ کۆببنەوە. 

 

کۆنفرانسە رۆژنامەڤانییەکە بێ پرسیاری رۆژنامەڤانان کۆتایی هات.