لە ئەنجامی کەوتنەوەی ئاگرێک لە مەسەدۆنیای باکوور 59 کەس گیانیان لەدەستدا

 

میدیای فەرمیی مەسەدۆنیای باکوور ئەمڕۆ یەکشەممە بڵاویکردەوە، لە کۆنسێرتی یانەیەکی شەوانە کە نزیکەی هەزار و 500 کەس تێیدا کۆببوونەوە، ئاگرێک کەوتەوە و لە ئەنجامدا 59 کەس گیانیان لەدەستدا و 100ـی دیکەش بریندار بوون.

 

رووداوەکە لە شارۆچکەی کۆچهانی روویداوە کە نزیکەی 100 کیلۆمەتر لە رۆژهەڵاتی سکۆپی پایتەختەوە دوورە.

 

ئاگرەکە کاژێر03:00 بەیانی بە کاتی مەسەدۆنیا و (05:00ـی بەیانی بە کاتی هەولێر) کەوتووەتەوە.

 

پانس تۆسکۆڤسکی، وەزیری ناوخۆی وڵاتەکە دەڵێت، ئاگرەکە بەهۆی بەکارهێنانی یاری ئاگرین کەوتووەتەوە. 

 

تۆسکۆڤسکی دەڵێت، "دوای ئەوەی یاریە ئاگرینەکان بەکارهێندراون، بنمیچی یانەکە ئاگری گرتووە و زۆر بەخێرایی تەواوی یانەکەی گرتووەتەوە."

 

بەشێک لە بریندارەکان بە هێلیکۆپتەر گوێزراونەتەوە نەخۆشخانە.

 

لە رووداوێکی هاوشێوەدا لە ساڵی 2021، بەهۆی ئاگر لە بنکەیەکی تایبەت بە توشبووانی کۆرۆنا، 14 کەس گیانیان لەدەستدا.