ئیمارات: بڕیاری چوونەدەرەوەمان لە ئۆپێک بڕیارێکی ستراتیژی بوو

 

وەزیری وزەی ئیمارات لە پۆستێکدا لە تۆڕی کۆمەڵایەتیی (X) گوتی، ئەم بڕیارە دوای پێداچوونەوەیەکی گشتگیر و ورد بۆ سیاسەتی بەرهەمهێنانی نیشتمانی و تواناکانی وڵات هات. مەزروعی دەڵێت: "ئەم بڕیارە تەنیا لەسەر بنچینەی رێنمایی بەرژەوەندییە نیشتمانییەکانی ئیمارات، رۆڵی وڵاتەکەمان وەک دابینکەرێکی جێگەی متمانەی وزە و پابەندبوونی ئێمە بە سەقامگیریی بازاڕەکان درا".

 

وەزیرە ئیماراتییەکە ئەو دەنگۆیانەی رەتکردنەوە کە باس لە بوونی ململانێی سیاسی دەکەن و گوتی: "ئەم هەنگاوە هیچ پاڵنەرێکی سیاسی لە پشت نەبوو و گوزارشت لە بوونی هیچ لێکترازانێک لە نێوان ئیمارات و هاوبەشەکانی ناکات."

 

سوهەیل مەزروعی باسی لەوە کرد، بڕیارەکانی ئیمارات سەروەرین و تەنیا بەرژەوەندیی نیشتمانی دەیانجووڵێنێت، نەک "پێشبینی و لێکدانەوە دەرەکییەکان."

 

رێکخراوی (ئۆپێک) لە ساڵی 1960 دامەزراوە و عێراق یەکێکە لە ئەندامە دامەزرێنەرەکانی. ئیمارات لە ساڵی 1967ـەوە ئەندام بوو لەم رێکخراوەدا، بەڵام لەم ساڵانەی دواییدا بەهۆی سنووردارکردنی رێژەی بەرهەمهێنان تووشی کێشە بوو لەگەڵ ئەندامانی دیکەی. 

 

ئیمارات وەبەرهێنانی ملیاران دۆلاری لە کێڵگە نەوتییەکانیدا کردووە و دەیەوێ ئاستی بەرهەمهێنانی بۆ 5 ملیۆن بەرمیل لە رۆژێکدا بەرز بکاتەوە و هەربۆیە 1-5-2026 لە ئۆپێک و ئۆپێک پڵەس دەرچوو.