ترەمپ: لەگەڵ پووتین تاڕادەیەکی زۆر لەسەر گۆڕینەوەی خاک رێککەوتووین

رۆژی هەینی، 15-08-2025، لە هەڤپەیڤینێک لەگەڵ شۆن هانیتی لە کەناڵی فۆکس نیوز، کاتێک پرسیاری لێکرا سەبارەت بە سازشکردن لەسەر خاک کە خاکی نوێ دەداتە رووسیا و ئەگەری پێدانی گەرەنتیی ئەمنیی ئەمریکی بە ئۆکراینا، ترەمپ پشتڕاستی کردەوە کە ئەمە خاڵێکی رێککەوتن بووە لەگەڵ پووتین.

 

ترەمپ گوتی: "پێموایە ئەوانە ئەو خاڵانە بوون کە لەسەریان دانوستاندنمان کرد و ئەوانە ئەو خاڵانەن کە تا رادەیەکی زۆر لەسەریان رێککەوتووین."

 

سەرۆکی ئەمریکا گوتیشی: "لە راستیدا، پێموایە ئێمە لەسەر زۆر شت رێککەوتووین. دەتوانم پێتان بڵێم، کۆبوونەوەکە کۆبوونەوەیەکی گەرم بوو."

 

ترەمپ، پووتینی بە "پیاوێکی بەهێز" و "زۆر تووند" وەسفکرد، بەڵام رایگەیاند کۆبوونەوەکە ئەرێنی بووە.

 

لە کۆتاییدا ترەمپ گوتی: "پێموایە ئێمە زۆر لە کۆتاییەوە نزیکین. پێویستە ئۆکراینا پێی رازی بێت."

 

ئامۆژگاریی ترەمپ بۆ ڤۆلۆدیمیر زیلینسکی، سەرۆکی ئۆکراینا، کورت و پوخت بوو: "پێویستە رێککەوتنێک بکات."