بەریتانیا کۆمەڵێک سزای نوێ بەسەر رووسیادا دەسەپێنێت

 

رۆژی دووشەممە، 17ـی تەممووزی 2023، جەیمس کلێڤەرلی، وەزیری دەرەوەی بەریتانیا لە راگەیێندراوێکدا، 14 سزای نوێی بەسەر چەند کەسایەتییەکی رووسیادا سەپاند و لەنێو سزادراوەکاندا هەریەکە لە سێرگی کراڤستۆڤ، وەزیری پەروەردەی رووسیا و سێنا میشۆنۆڤا، سەرۆکی دەستەی مافەکانی مرۆڤی ناوچەی مۆسکۆ هەن وەزارەتی دەرەوەی بەریتانیا دەڵێت، هەردوو کەسایەتییەکە، "رۆلێکی کاریگەریان لە بەرنامەی دیپۆرتکردنەوەدا هەیە بۆ ئەوەی کولتوور و ناسنامەی نیشتمانی ئۆکراینا بسڕنەوە."

 

بەگوێرەی راگەیێندراوەکی وەزارەتی دەرەوەی بەریتانیا، "زیاتر لە 19 هەزار منداڵی ئۆکراینی بەشێوەیەکی زۆرەملێ بەرەو رووسیا و ئەو ناوچانەی کە رووسیا لە ئۆکراینا کۆنتڕۆلی کردوون راگوێزراون." 

 

منداڵە ئۆکراینییەکان، بەگوتەی وەزارەتی دەرەوەی بەریتانیا، "بەرەو کەمپەکان گوێزراونەتەوە و دووبارە پەروەردە دەکرێنەوە و فێری کولتووری رووسی و نیشتمانپەروەری دەکرێن و پەروەردەی سەربازییان پێدەدرێت."

 

کراسۆڤسکی، رۆژنامەڤانی رووسی لە لیستی سزادراوەکانی بەریتانیادا هەیە و وەزارەتی دەرەوەی بەریتانیا هۆکارەکەی گەڕاندووەتەوە بۆ "بڵاوکردنەوەی پڕوپاگەندەی ناراست کە بوونەتە هۆی هاندانی تووندوتیژی، رق و کینە بەرامبەر بە ئۆکراینا و گەلەکەی."

 

ئۆلگا لیومبیمۆڤا، وەزیری کولتووری رووسیا یەکێکی دیکەیە لە سزادراوان کە تۆمەتی "بەکارهێنانی پۆستەکەی بۆ پشتگیریکردنی سیاسەتی رووسیا دژی ئۆکراینا" دراوەتەپاڵ. 

 

دوای دەستپێکردنی شەڕی نێوان رووسیا و ئۆکراینا لە شووباتی 2022، ئەمریکا، بەریتانیا و وڵاتانی ئەوروپی بەردەوام رووسیایان بەوە تۆمەتبارکردووە کە منداڵانی ئۆکراینی دەگوازێتەوە ئەو ناوچانەی کە لە ئۆکراینا کۆنتڕۆڵی کردوون.

 

لەدوای هێرشی رووسیا بۆ سەر ئۆکراینا لە شووباتی 2022دا، ئەمریکا، بەریتانیا و وڵاتانی رۆژئاوا زیاتر لە هەزار و 600 بەرپرس و کەسایەتی رووسیان خستوونەتە لیستی سزاکانیانەوە.