ئەندامانی کۆنگرێسی ئەمریکا داوا لە دیمەشق دەکەن هێرشەکانی بۆ سەر هەسەدە بوەستێنێت

 

کۆنگرێسمانەکان هەروەها هۆشداری بە دیمەشق دەدەن کە ئەگەر تووندوتیژی نەوەستێنێت، ئەوا دەکرێت سزای قەیسەر بەسەر سووریادا بسەپێننەوە. 

 

ئەم نیگەرانییانە دوای ئەوە دێن کە هێزەکانی سەربە حکومەتی راگوزەری سووریا پێشڕەوییان لە دژی هەسەدە کرد. 

 

کۆنگرێسی ئەمریکا سزاکانی یاسای قەیسەری لە کۆتایی 2025دا وەک ئاماژەیەک بۆ پشتیوانیکردن لە قۆناخی راگوزەری سووریا هەڵگرت، بەڵام کۆنگرێسمانەکان جەختیان کردەوە کە ئەم هەنگاوە مەرجدارە بە پاراستنی هەموو سوورییایەکان و پابەندبوون بە رێککەوتننامەکانی پێشووەوە.

 

مایکل مەککۆڵ، ئەندامی کۆنگرێس و سەرۆکی پێشووی لیژنەی کاروباری دەرەوەی ئەنجوومەنی نوێنەران، لە پێشەنگی رەخنەگرانەوە رایگەیاند: "لەکاتێکدا هەواڵی زۆر هێرشی دڕندانە لەسەر کەمینە ئایینی و نەتەوەییەکانی سووریا هەن، وەک کرستیان، درووز و کورد، داوا لە حکومەتی سووریا دەکەم کە کاری زیاتر بکات بۆ راگرتنی دەستبەجێی تووندوتیژییەکان. هەڵگرتنی سزاکانی یاسای قەیسەر لەلایەن کۆنگرێسەوە نابێت بە شێوەی هەڵە وەک بێباکییەک لە کارەکانی حکومەت لێکبدرێتەوە، بەڵکو وەک چاوەڕوانییەکە کە ئەوان داهاتوویەکی باشتر دروست دەکەن کە تێیدا هەموو سوورییەکان بتوانن بە ئاشتی بژین."

 

مەککۆڵ لە پۆستێکی دواتردا گوتی: "بە قووڵی نیگەرانە لەو هەواڵانەی کە دەڵێن هێزە چەکدارەکان لە دژی هێزەکانی سووریای دیموکرات لە حەلەبدا پێشڕەوی دەکەن." 

 

مەککۆڵ هەروەها وەبیری دیمەشقی هێنایەوە کە مەرجێکی لابردنی سزاکان، پاراستنی پێکهاتەکان و پابەندبوون بووە بە رێککەوتننامەی 10ی ئادار یەکگرتن لەگەڵ هەسەدە. کۆنگرێسمانەکە داوای کەمکردنەوەی "دەستبەجێ"ی گرژییەکانی کرد و هۆشداریی دا کە "کۆنگرێس و ئەمریکا بە وردی چاودێری دەکەن."

 

مارلین ستوتزمان، ئەندامی کۆنگرێس، پەیامەکەی مەککۆڵی بڵاوکردەوە و جەختی کردەوە کە تووندوتیژی لە سووریادا بەرپرسیارێتیی راستەوخۆی حکومەتی شەرعە. ستوتزمان نووسی: "ئەوان دەبێت هەموو سوورییەکان لە هێرش بپارێزن، هەر ئایینێکیان هەبێت." 

 

هەروەها جەختی کردەوە کە ئەم رەوشە "دیاری دەکات کە ئەمریکا لە داهاتوودا چۆن مامەڵە لەگەڵ دیپلۆماسیی سووریا دەکات،" گوتیشی: "ئەگەر شەرع پێویستی بە یارمەتی بێت بۆ وەستاندنی تووندوتیژییەکان، دەبێت داوای یارمەتی بکات! سزاکان دەکرێت بگەڕێندرێنەوە!"

 

لیژنەی کاروباری دەرەوەی ئەنجوومەنی نوێنەران هەڵوێستی خۆی نیشان دا و رایگەیاند: "گەلی کورد ماوەیەکی درێژە شەڕیان لەپێناو داهاتوویەکی باشتر بۆ سووریا کردووە و هاوبەشێکی جێگیری ئەمریکا بوون. کاتی ئەوە هاتووە کە ئەحمەد شەرع، سەرۆکی سووریا شوێنپێی ئەوان هەڵبگرێت و کار بۆ داهاتووی وڵاتەکەی بکات، نەک شەڕ لەگەڵ گەلی کورد بکات." 

 

کەسایەتیی دیکەی وەک نادین مایینزا، سەرۆکی پێشووی کۆمسیۆنی ئەمریکا بۆ ئازادییە ئایینییە نێودەوڵەتییەکان، تیشکی خستەسەر هێرشە بەردەوامەکان و داوای راگرتنی پێشڕەوییەکانی بەرەو تەبەقە و رەققە کرد و جەختی لەسەر پێویستیی گفتوگۆ کردەوە بۆ پاراستنی ئەو کۆمەڵگە فرەڕەنگانەی کە دوای شکستی داعش دروست کراون.

 

لێدوانەکان رەنگدانەوەی ناڕەزایی بەرفراوانی هەردوو پارتی دیموکرات و کۆمارین لە واشنتن لەبارەی سەقامگیریی سووریاوە دوای کەوتنی بەشار ئەسەد لە کانوونی دووەمی 2024دا. هەرچەندە حکومەتی راگوزەر بەڵێنی پاراستنی پێکهاتەکانی داوە، وەک بڕیارێکی ئەم دواییە کە مافەکانی کورد پشتڕاست دەکاتەوە، بەڵام پێکدادانەکان بەردەوامن، کە مەترسیی شەڕی بەرفراوان یان بەئامنجکردنی نەتەوەیی زیاد کردووە.

 

کۆنگرێس جەخت دەکاتەوە کە "تووندوتیژیی بەردەوام" دەکرێت ببێتە هۆی ئەوەی جارێکی دیکە سزاکان بەسەر دیمەشقدا بسەپێنرێنەوە یان ئەمریکا سیاسەتی خۆی لە بەرامبەریدا بگۆڕێت.