پۆڵەندا: بڕیاری نەناردنی 4000 سەرباز لەلایەن واشنتنەوە شۆکی کردین

 

رۆژی دووشەممە، 18ی ئایاری 2026، دوو بەرپرسی باڵای وەزارەتی بەرگریی پۆڵەندا بەرەو واشنتن بەڕێکەوتن تاوەکو زانیاریی زیاتر لەسەر ئەو بڕیارە کتوپڕەی ئەمریکا بەدەستبهێنن. پاوڵ زاڵێڤسکی، جێگری وەزیری بەرگری گوتی: "کەس لە پۆڵەندا نەیدەزانی کە ناردنی تیمی سەربازیی ئەمریکی رادەگیرێت."

 

ئەم هەنگاوەی پیت هێگسەس، وەزیری جەنگی ئەمریکا، لە کاتێکدایە کە واشنتن پێشتر بڕیاری کشانەوەی پێنج هەزار سەربازیشی لە ئەڵمانیا دابوو. بەڵام جیاوازییەکە ئەوەیە پۆڵەندا بە پێچەوانەی ئەڵمانیا، هیچ رەخنەیەکی لە جەنگی ئەمریکا و ئیسرائیل دژی ئێران نەگرتووە و گەورەترین وەبەرهێنەری کەرتی بەرگرییە لە ناو ناتۆدا.

 

دۆناڵد تەسک، سەرۆکوەزیرانی پۆڵەندا، لە مەراسیمی کردنەوەی سەنتەرێکی چاککردنەوەی تانکە ئەبرامزە ئەمریکییەکان گوتی: "ئەمریکا هاوپەیمانێکی باشتر لە ئێمە لە هیچ شوێنێک نادۆزێتەوە. پێویستە ئەوە بیر بهێندرێتەوە کە پۆڵەندا دڵسۆزترین هاوپەیمانی ئێوەیە." تەسک بڕیارەکەی ئەمریکای بە "لۆجستی" وەسف کرد و گوتی کاریگەریی لەسەر توانای بەرگریی وڵاتەکەی نابێت.

 

لەلایەکی دیکەوە، ڤلادیسلاو کۆسینیاک کامیش، وەزیری بەرگریی پۆڵەندا، نیگەرانیی خۆی دەربڕی و گوتی: "ئێمە هاوپەیمانێکی سەلمێندراو و جێگەی متمانەین، بۆیە داوای هاوبەشی و دۆستایەتی و گۆڕینەوەی زانیاریی دروست دەکەین." بڕیارە بەرپرسانی سەربازیی پۆڵەندا لەم هەفتەیەدا لەگەڵ ژەنەراڵ دان کەین، سوپاسالاری ئەمریکا کۆببنەوە.

 

ئەم بڕیارەی ئەمریکا وایکردوە لایەنە ناکۆکەکانی ناوخۆی پۆڵەنداش یەکبگرن. سەرەڕای لێکترازانی نێوان حکومەتەکەی تەسک و سەرۆکی پۆڵەندا کارۆڵ ناڤرۆکی، هەردوولا جەخت دەکەنەوە، کە دەبێت واشنتن وەک هاوپەیمانێکی ستراتیژی بمێنێتەوە.

 

لەگەڵ ئەوەشدا، مارسین پڕزیداچ، راوێژکاری سیاسیی ناڤرۆکی، رەخنەی لە هەندێک لێدوانی رابردووی تەسک گرت کە گومانی لە دڵسۆزیی ئەمریکا بۆ ئەورووپا کردبوو  و داوای لە حکومەت کرد کۆتایی بەو گوتارە "دژە ئەمریکییە" بهێنێت، چونکە زیان بە ئاسایشی پۆڵەندا دەگەیەنێت.

 

ئەم ئاڵۆزییە دیپلۆماسییانە لە کاتێکدا دێن کە پۆڵەندا سەربازانی ئەمریکا وەک قەڵخانێکی سەرەکی بۆ رێگری لە دەستدرێژییەکانی رووسیا دەبینێت و کەمکردنەوەی ئەو هێزانە لە ژێر گوشارێکی زۆری جەنگی رۆژهەڵاتی ناوەڕاستدا، نیگەرانیی لای وارشۆ و هاوپەیمانەکانی دیکەی ناتۆ دروست کردووە.