ئیتاڵیا ئەم هەفتەیە 89 پەنابەری وەرگرتووە
رووداو دیجیتاڵ
هەرچەندە ئیتاڵیا بەوە ناسراوە کە سیاسەتێکی تووندی بەرامبەر کۆچبەران و پەنابەران هەیە، بەڵام هێشتاش ئەگەر بە ژمارەیەکی کەمیش بێت پەنابەران وەردەگرێت.
ئەم هەفتەیە 89 کۆچبەر لە تورکیا و پاکستانەوە بە فڕۆکە و بە شێوەی یاسایی گەیشتوونەتە ئەو وڵاتە.
کۆچبەرەکان لە چوارچێوەی پرۆگرامێکی پەنابەرانی سەر بە نەتەوە یەکگرتووەکانەوە هێندراونەتە ئیتاڵیا و زۆربەیان ئەفغانین.
لە ماوەی 10 ساڵی رابردوودا لە رێگەی ئەو پرۆگرامەوە نزیکەی 3000 کۆچبەر هێندراونەتە ئیتاڵیا، کە خەڵکی رۆژهەڵاتی کوردستان و ئێران، رۆژئاوای کوردستان و سووریا، باکووری کوردستان و تورکیاشیان لەنێودا بووە.