دانیشتووانی ئەڵمانیا 5% کەمدەبێتەوە؛ ناچارە کۆچبەر وەربگرێت؟

 

 

بەپێی توێژینەوەی پەیمانگەی ئابووریی (Ifo) کە پشت بە ئامارە فەرمییەکانی حکومەتی ئەڵمانیا دەبەستێت:

 

- ژمارەی دانیشتووان لە نزیکەی 83 ملیۆن کەسەوە لە ساڵی 2025، دادەبەزێت بۆ 79 ملیۆن کەس لە ساڵی 2050.

 

- پێشبینی دەکرێت تاوەکو ساڵی 2070، ژمارەی دانیشتووان 10% کەم بکات.

 

 

کەمبوونەوە و پیربوونی دانیشتووان کێشەی گەورە بۆ گەورەترین ئابووریی ئەورووپا دروست دەکات. بەهۆی ئەوەی ژمارەی گەنجان و ئەو کەسانەی کار دەکەن کەم دەبێتەوە و لە بەرامبەردا ژمارەی خانەنشینان زیاد دەکات، گوشارێکی زۆر دەکەوێتە سەر سیستمی خانەنشینی و خەرجییە گشتییەکانی وڵات، کە بەشێکی زۆری بودجە دەبات.

 

 

کەمبوونەوەی دەستی کار دەبێتە هۆی خاوبوونەوەی گەشەی ئابووری. بەرپرسانی ئەڵمانیا هەوڵ دەدەن لەرێگەی هێنانی کۆچبەری کارامە و هاندانی خەڵک بۆ کارکردن ئەم بۆشاییە پڕبکەنەوە، بەڵام کێشەکە قووڵە و بۆ دەیان ساڵ بەردەوام دەبێت.

 

پێویستیی زیاتر بە کەرتی تەندروستی

 

بەهۆی پیربوونی کۆمەڵگەوە، داواکاری لەسەر نەخۆشخانە و چاودێریی کۆمەڵایەتی زیاد دەکات. داتاکان دەڵێن تا ساڵی 2050، نزیکەی 30%ـی دانیشتووانی ئەڵمانیا تەمەنیان لە 65 ساڵ بەرەو سەرەوە دەبێت.

 

شارەزایان دەڵێن بۆ رووبەڕووبوونەوەی ئەم قەیرانە، دەبێت ئەڵمانیا چەند هەنگاوێک بگرێتەبەر، لەوانە:

 

1- چاکسازی لە بازاڕی کاردا.

 

2- پاڵپشتیکردنی خێزانەکان بۆ منداڵخستنەوە.

 

3- هێنانی کۆچبەری زیاتر.