ترەمپ: تووڕەییەکی زۆر لە ئێراندا هەیە و هیچ پەلەی رێککەوتنم نییە

 

 

 

لەبارەی دانوستاندنەکانەوە، سەرۆکی ئەمریکا رایگەیاند، پەلەی لە گەیشتن بە رێککەوتن نییە، سەرەڕای نزیکبوونەوەی هەڵبژاردنی نیوەخول. ترەمپ گوتی: "خەڵک وا بیردەکاتەوە، هەڵبژاردنی نیوەخولە بۆیە پەلەمە؟ من پەلەم نییە."

 

ترەمپ ئامانجی سەرەکیی خۆی لە دانوستاندنەکاندا خستەڕوو و گوتی: "من تەنیا حەزدەکەم ژمارەیەکی کەمی خەڵک بکوژرێن، نەک ژمارەیەکی زۆر. دەتوانین بە هەردوو شێوەکە بیکەین، بەڵام حەزدەکەم ژمارەیەکی کەمی خەڵک بکوژرێن." ئەو مەرجی کردنەوەی تەنگەی هورمزیشی دووپاتکردەوە و گوتی، "دەبێت تەنگەکە بکەنەوە، دەستبەجێ بکرێتەوە."

 

دۆناڵد ترەمپ شانازیی بە کەمبوونەوەی ژمارەی قوربانییەکانی سوپای ئەمریکاوە کرد لە جەنگی ئێراندا و بەراوردی کرد بە جەنگە درێژخایەنەکانی پێشووی وڵاتەکەی.

 

ترەمپ گوتی: "19 ساڵ لە ڤێتنام بووین. لە ئەفغانستان و شوێنەکانی دیکە 10 ساڵ بوو. لە عێراق 12 ساڵ. لە کۆریا بۆ ماوەی 7 ساڵ، سەدان هەزار سەربازتان لەم جەنگە جیاوازانەدا لەدەستدا. من بۆ ماوەی 3 مانگە لەمەدام [جەنگی ئێران] و زۆربەشی ئاگربەست بووە."

 

سەرۆکی ئەمریکا گوتی: "لە دوو جەنگدا، ڤەنزوێلا کە هیچ کەسمان لەدەستنەدا و لێرە [لە ئێران]، 13 کەسمان لەدەستداوە."

 

لە بەشێکی دیکەی قسەکانیدا، ترەمپ تیشکی خستە سەر دۆخی ناوخۆی ئێران وەک یەکێک لە هۆکارەکانی سەرکەوتنی سیاسەتەکەی و پێیوابوو گوشارەکان کاریگەرییان هەبووە و گوتی، "ئێستا تووڕەییەکی زۆر لە ئێران هەیە، چونکە خەڵک زۆر بە خراپی دەژین. ورووژانێکی زۆر هەیە کە پێشتر ئەوەندەمان نەبینیوە و با بزانین چی روودەدات."