بەریتانیا یەکەیەکی تایبەتی دروستکردووە بۆ هەڵکوتانە سەر بزنسە بچووکەکان
رووداو دیجیتاڵ
حکومەتی بەریتانیا یەکەیەکی تایبەتی هێزەکانی ئاسایشی دروستکردووە، کە ئیشیان تەنیا بەسەردادانی بزنسە بچووکانی وەکو سوپەرمارکێت، سەرتاشخانە، ڤەپیفرۆشی و شیرینیفرۆشییەکانی دیاسپۆرای کوردستانیانە.
30 ملیۆن پاوەند بۆ یەکە تایبەتەکەی هێزەکانی ئاسایشی بەریتانیا تەرخانکراوە، 75 ئەفسەری پۆلیسی بۆ دامەزرێندراوە.
سەرەتای ئەرکی ئەو یەکە تایبەتە لە چوار ناوچەوە دەستپێدەکات، کە دیاسپۆرایەکی کوردستانیی گەورەیان لێدەژین؛ ئەوانیش ناوچەکانی مانچێستەری مەزن، وێست میدلەندس، ئێسسێکس و کێنتە.
حکومەتی بەریتانیا دەڵێت، لەو بزنسە بچووکانەوە ساڵانە نزیکەی یەک ملیار پاوەند پارە سپی دەکرێتەوە، خۆدەدزرێتەوە لە دانی پارەی باج، بازرگانی بە ماددەی هۆشبەر دەکرێ و کۆچبەری نایاسایی دەهێندرێتە بەریتانیا.