کۆشکی سپی هۆشداریی تووند دەداتە ئێران
رووداو- واشنتن
کۆشکی سپی رەخنە لە سیاسەتی ئێران دەگرێت و داوای لێدەکات تەواوی ئەو ئەمریکیانە ئازاد بکات کە لە ماوەی چەند ساڵی رابردوودا بە بیانووی جیاواز دەستگیری کردوون.
کۆشکی سپی لە رێگەی بڵاوکردنەوەی راگەیێندراوێکەوە دەڵێت"نزیکەی چل ساڵە ئێران دەستگیرکردن و بە بارمتەگرتن وەک ئامرازێکی سیاسەتی دەوڵەت بەکاردەهێنێت".
هەر لە راگەیێندراوەکەدا هاتووە، ئێران بەرپرسە لە بواری تەندروستی و سەلامەتی هەر کەسێکی ئەمریکی کە دەستگیری کردووە و داوا لە تارانیش دەکات لە ماوەیەکی کورتدا هەموویان ئازاد بکات.
لە راگەیێندراوەکەی کۆشکی سپیدا ئاماژە بە هەندێک کەس کراون کە بەرپرسانی ئەمریکی جەخت لە سەر ئازادکردنیان دەکەنەوە، لەوانەش رۆبەرت لێڤنسن کە ماوەی 10 ساڵە دەستگیرکراوە، سیامەک نەمازی و باقر نەمازی، کە لە سەردەمی ئیدارەی ئۆبامادا دەستگیرکران".
کۆشکی سپی دەڵێت، دۆناڵد ترەمپ کاردانەوەی تووندی دەبێت ئەگەر بێت و ئێران تەواوی ئەو ئەمریکیانە ئازاد نەکات کە دوور لە هەر بەها و رێکارێکی دادپەروەری دەستگیرکراون و زیندانیکراون.