زیاتر لە 700 کارمەندی ئەیرباس بە جارێک ژەهراوی بوون

 

 

رووداوەکە هەفتەی رابردوو روویداوە و بەرپرسانی تەندروستی فەرەنساش پشتڕاستیان کردووەتەوە.

 

بەگوێرەی ئاژانسی تەندروستیی ARS، ئەو 700 کارمەندە کە لە لقی رۆژئاوای فەرەنسای کۆمپانیاکەن، لە پاش نانخواردن تووشی سکچوون و رشانەوە هاتوون.

 

ئەیرباس ئەتلانتیک بەشێکە لە ئەیرباس و 15 هەزار کارمەندی لە پێنج وڵاتدا هەیە. ئەیرباس کە گەورەترین دامەزراوەی بواری دروستکردنی فڕۆکەیە لە جیهاندا 134 هەزار کارمەندی لەسەر ئاستی دنیا هەیە.

 

تاوەکو ئێستا ئەیرباس ئەتلانتیک هۆکاری سەرەکی نەخۆشکەوتنی کارمەندەکانی رانەگەیاندووە و نازانرێت ئەو خواردنانەی پێشکێشکرابوون چی بوون.

 

لێکۆڵینەوە لە رووداوەکە دەستیپێکردووە تاوەکو بزانرێت هۆکاری ژەهراویبوونی ئەو کارمەندانە چی بووە.

 

بەدەر لەم رووداوە، ماوەیەک لەمەوبەر هەر لە فەڕەنسا و لە شاری بۆردۆکس، ژمارەیەک هاووڵاتی دوای نانخواردن لە خواردنگەیەکدا نەخۆشکەوتن، دواتر یەکێکیان کە بە بنەچە یۆنانی بوو، گیانی لەدەستدا.