پەرلەمانتارێکی ئەورووپا: دۆستێکی زۆری کورد لێرە هەن و پشتگیریی هەرێمی کوردستان دەکەین

 

 

دکتۆر دلاوەر ئاژگەیی، نوێنەری حکومەتی هەرێمی کوردستان لە یەکێتیی ئەورووپا لە لێدوانێکدا بۆ رووداو رایگەیاند، لە کۆبوونەوەکەدا پوختەیەک لە دوایین گۆڕانکارییە سیاسییەکانی ناوچەکە و هەرێمی کوردستانی بۆ پەرلەمانتارە ئەورووپییەکە خستووەتەڕوو. ئاژگەیی ئاماژەی بەوەش کرد، سیاسەت و تێڕوانینی حکومەتی هەرێمی کوردستان بۆ کۆی رووداوەکان روون کراوەتەوە، بەتایبەت ئەو پرسانەی پەیوەستن بە ئاسایشی نیشتمانی و پێکەوەژیان.

 

 

تەوەرێکی سەرەکیی دانیشتنەکە تەرخانکرابوو بۆ رووداوەکانی سووریا و رۆژئاوای کوردستان. لەو بارەیەوە نوێنەری حکومەت باسی لە هەوڵە بەردەوامەکانی سەرکردایەتیی سیاسیی هەرێمی کوردستان، بەتایبەت سەرۆک مەسعود بارزانی کرد، بۆ دابینکردنی ئاسایش و سەقامگیری لەو ناوچانە و پاراستنی مافەکانی گەلی کورد لەوێ، "هەردوولا کۆک بوون لەسەر ئەوەی هەرێمی کوردستان فاکتەرێکی بەهێزی ئارامییە لە رۆژهەڵاتی نێوەڕاست دا."

 

 

سیسیلیا سترادا، کە وەکو دۆستێکی دێرینی گەلی کوردستان دەناسرێت و پێشتر رۆڵی کاریگەری هەبووە لە دروستکردنی "نەخۆشخانەی ئیمێرجێنسی" بۆ هەرێمی کوردستان، لە کۆبوونەوەکەدا دووپاتی کردەوە، "کورد دۆستێکی زۆری لە پەرلەمانی ئەورووپا هەیە." سترادا ئامادەیی خۆی و گرووپەکەی دەربڕی بۆ هەر جۆرە پشتگیری و هاوکارییەک، کە خزمەت بە دۆزی رەوای گەلی کورد و پاراستنی قەوارەی هەرێمی کوردستان بکات.

 

 

لە دیدارەکەدا، باس لە ئەنجامدانی زنجیرەیەک چالاکی و پرۆژەی هاوبەش کرا، کە بڕیارە لەناو پەرلەمانی ئەورووپا بە هاوئاهەنگی لەگەڵ نوێنەرایەتیی حکومەتی هەرێمی کوردستان جێبەجێ بکرێن، بە ئامانجی زیاتر ناساندنی دەستکەوتەکان و رووبەڕووبوونەوەی ئەو ئاڵنگارییانەی بەرۆکی هەرێمی کوردستانیان گرتووە.