فرێدریش مێرتس: چین 120 فڕۆکەی ئێرباس دەکڕێت

 

رۆژی چوارشەممە 25-02-2026 مێرتس دوای کۆبوونەوەکانی لەگەڵ بەرپرسانی چین گوتی: "سەرکردایەتیی چین داوای ژمارەیەکی زیاتر لە فڕۆکەی ئێرباس دەکەن، کۆی گشتیی داواکارییەکانیان دەگاتە 120 فڕۆکەی زیادە." 

 

هەرچەندە وردەکاریی زیاتری لەسەر جۆری فڕۆکەکان و کاتی رادەستکردنیان نەخستە روو، بەڵام ئەم گرێبەستەی بە نیشانەی "پەیوەندییەکی هیوابەخش" لە نێوان هەردوو وڵاتدا وەسف کرد.

 

راوێژکاری ئەڵمانیا، کە شاندێکی گەورەی بازرگانیی لەگەڵدایە، لەگەڵ شی جینپینگ، سەرۆککۆماری چین و لی چیانگ، سەرۆکوەزیران کۆبووەوە. مێرتس داوای هاوکارییەکی "دادپەروەرانەتر"ـی کرد و چەندین خاڵی جێناکۆکی خستە روو، لەوانە: ناهاوسەنگیی لە ئاڵوگۆڕی بازرگانی، متمانە بە دابینکردنی کانزا دەگمەنەکان، پشتگیریی دارایی حکومەت بۆ کۆمپانیا چینییەکان و نرخی دراوی یوان.

 

شی جینپینگ جەختی لە گرنگیی پەیوەندییەکان کردەوە و گوتی: "هەرچی جیهان ئاڵۆزتر بێت، گرنگیی هاوئاهەنگیی ستراتیژیی نێوان چین و ئەڵمانیا زیاتر دەبێت."

 

 

ئەم سەردانەی مێرتس کە یەکەمین سەردانیەتی لەوکاتەوەی پۆستەکەی لە ساڵی 2025 وەرگرتووە، دوای سەردانی سەرکردەکانی فەرەنسا، کەنەدا و بەریتانیا سەردانی پەکینی کرد. 

 

ئەم جووڵە دیپلۆماسییانەی ئەورووپا وەک کاردانەوەیەک دەبینرێن بەرامبەر سیاسەتەکانی دۆناڵد ترەمپ، سەرۆکی ئەمریکا کە پێناسی گومرگیی توندی سەپاندووە و گومانی لەسەر هاوپەیمانییە کۆنەکان دروست کردووە. مێرتس پێش سەردانەکە رایگەیاندبوو: "چین بۆ هەمووان بووەتە وڵاتێکی دەستبەردارنەبوو."

 

لە رووی سیاسییەوە، مێرتس داوای لە پەکین کرد کە "هەژموونی خۆی" بەسەر رووسیادا بەکاربهێنێت بۆ کۆتاییهێنان بە جەنگی ئۆکرانیا و جەختی کردەوە، نابێت هیچ کاڵایەکی سەربازی یان (سەربازی و مەدەنی) بە مۆسکۆ بدرێت. سەبارەت بە تایوانیش گوتی، هەر هەوڵێک بۆ یەکگرتنەوە تەنیا دەبێت بە رێگەی ئاشتییانە بێت نەک سەربازی.

 

بڕیارە سبەی پێنجشەممە، راوێژکاری ئەڵمانیا ئامادەی نماییشی ئۆتۆمبێلە بێشۆفێرەکانی (مێرسەیدیز) بێت و سەردانی لقەکانی کۆمپانیای (سیمێنس) و کۆمپانیاکانی رۆبۆتیک لە شاری هانگژۆ بکات، کە ئەمەش نیشانەی بایەخی ئەڵمانیایە بە کێبڕکێ لە کایە تەکنەلۆژییە پێشکەوتووەکاندا.