مووشەکێکی رووسی مانگێکی دەستکردی ئێرانی رەوانەی بۆشایی ئاسمان کرد

 

 

رۆژی هەینی 25ی تەممووزی 2025 تەلەڤیزیۆنی فەرمیی ئێران رایگەیاند، "مانگی دەستکردی ناهید – 2 لە بنکەی ڤۆستۆچنی ئاسمانی رووسیاوە بە بەکارهێنانی مووشەکی سویوز هەڵدرا."

 

هەمان سەرچاوە ئاماژەی بەوەش کرد، مانگە دەستکردەکە کێشی 110 کیلۆگرامە و لەلایەن ئەندازیارانی ئێرانییەوە دیزاین و دروستکراوە.

 

وڵاتانی رۆژئاوا ماوەیەکی زۆرە نیگەرانیی خۆیان بەرامبەر ئەو پێشکەوتنە دەربڕیوە، کە ئێران لە بواری بۆشایی ئاسمانیدا بەدەستیهێناوە و پێیانوایە تاران لەو رێگەیەوە پەرە بە مووشەکی بالیستی دەدات.

 

رەوانەکردنی مانگە دەستکردەکە پێش دەستپێکردنی گفتوگۆ ئەتۆمییەکانی ئێران بوو لەگەڵ بەریتانیا، فەرەنسا و ئەڵمانیا لە ئیستەنبووڵ.

 

لە کانوونی یەکەمی رابردوو، ئێران رایگەیاند، بە بەکارهێنانی مووشەکهەڵگری نێوخۆیی، قوورسترین باری خۆی رەوانەی بۆشایی ئاسمان کردووە. 

 

هەروەها لە مانگی ئەیلوولدا، رایگەیاندبوو مانگی دەستکردی چەمران – 1ی بە بەکارهێنانی مووشەکهەڵگری قائیم – 100 رەوانەی بۆشایی ئاسمان کردووە کە بەشی فڕۆکەوانی سوپای پاسداران دروستی کردووە.