تۆڵەی خوێناوی؛ ئەفغانستان 15 خاڵی سەربازیی پاکستان کۆنتڕۆڵ دەکات و دەیان سەربازیان دەکوژێت

 

 

زەبیحوڵڵا موجاهید، گوتەبێژی حکومەتی ئەفغانستان رایگەیاند، هێزەکانی ئەفغانستان تەنیا لە ماوەی دوو کاژێردا توانیویانە زیاتر لە 15 خاڵی سەربازیی پاکستان کۆنتڕۆڵ بکەن. 

 

موجاهید گوتی: "دەیان سەربازی پاکستانی کوژراون و ئێمە تەرمی 10 سەربازمان گواستووەتەوە بۆ ناوچەی کونار و شوێنەکانی دیکە. هەروەها چەندین سەربازی دیکە بریندارن یان بە زیندوویی دەستگیر کراون."

 

لەلایەکی دیکەوە، وەزارەتی زانیاریی پاکستان هێرشەکەی ئەفغانستانی بە "بێ پاساو" وەسف کرد و رایگەیاند، هێزەکانیان بە شێوەیەکی "دەستبەجێ و کاریگەر" وەڵامی هێرشەکانیان داوەتەوە.

 

 

ئەم ئۆپەراسیۆنە سەربازییەی ئەفغانستان دوای ئەوە دێت، شەوی یەکشەممەی رابردوو، فڕۆکە جەنگییەکانی پاکستان ویلایەتەکانی نانگارهار و پاکتیکایان بۆردومان کرد. نێردەی نەتەوە یەکگرتووەکان لە ئەفغانستان رایگەیاند، لەو هێرشانەدا لانیکەم 13 هاووڵاتیی سڤیل کوژراون، بەڵام حکومەتی ئەفغانستان دەڵێ، ژمارەی کوژراوەکان گەیشتووەتە 18 کەس.

 

حکومەتی ئەفغانستان ئەو بانگەشەیەی پاکستانی رەتکردەوە کە گوتبووی، لەو هێرشانەدا 80 "چەکداری تێرۆریست"یان کوشتووە.

 

 

پەیوەندییەکانی نێوان هەردوو وڵات لە ماوەی چەند مانگی رابردوودا بە تەواوەتی داڕماون. لەوکاتەوەی پێکدادانە خوێناوییەکەی مانگی تشرینی یەکەمی رابردوو روویدا کە تێیدا زیاتر لە 70 کەس لە هەردوو لا کوژران، دەروازە سنوورییەکان بە داخراوی ماونەتەوە.

 

هەرچەندە وڵاتانی قەتەر و تورکیا هەوڵی نێوەندگیرییان دا بۆ چەسپاندنی ئاگربەست، بەڵام هەوڵەکان بێ ئەنجام بوون. لەم مانگەدا سعودیە دەستوەردانی کرد و توانی ئاسانکاری بکات بۆ ئازادکردنی سێ سەربازی پاکستانی کە لەلایەن ئەفغانستانەوە گیرابوون.

 

 

ئیسلام ئاباد کابول تۆمەتبار دەکات بەوەی، رێگری ناکات لەو گرووپە چەکدارانەی لە ناو خاکی ئەفغانستانەوە هێرش دەکەنە سەر پاکستان، بەڵام کابول ئەمە رەت دەکاتەوە. هێرشە ئاسمانییەکانی پاکستان دوای زنجیرەیەک تەقینەوەی خۆکوژیی خوێناوی هاتن؛ لەوانە هێرش بۆ سەر مزگەوتێکی شیعە لە ئیسلام ئاباد کە تێیدا 40 کەس کوژران و رێکخراوی داعش بەرپرسیارێتییەکەی گرتە ئەستۆ.

 

هەروەها لقی (داعشی خۆراسان) بەرپرسیارێتیی تەقینەوەیەکی خۆکوژیی لە ناو چێشتخانەیەک لە کابول لە مانگی رابردوودا راگەیاندبوو.

 

ئێستا دۆخەکە بە ئاراستەیەکی مەترسیداردا دەڕوات و تاوەکو ئێستا هیچ ئامارێکی فەرمی لەسەر قوربانییەکانی لایەنی ئەفغانی لە پێکدادانەکانی ئەمرۆدا بڵاونەکراوەتەوە.