ئەنجوومەنی ئاسایش داواکارییەکی رووسیا و چینی بۆ دواخستنی سزاکانی سەر ئێران رەتکردەوە

 

 

ئەو سزایانە کە بە میکانیزمی "گەڕانەوەی خێرا" یان "سناپباک" ناسراون، سەروەت و سامانی ئێران لە دەرەوەی وڵات سڕ دەکەن، فرۆشتنی چەک بە تاران رادەگرن و گەمارۆ دەخەنە سەر بەرنامەی مووشەکی بالیستی، ئەوەش گوشاری زیاتر دەخاتە سەر ئابوورییە داتەپیوەکەی ئەو وڵاتە.

 

دەنگدانەکەی رۆژی هەینی دوای ئەوە هات کە رووسیا و چین داوایان لە ئەنجوومەنی ئاسایش کرد پڕۆژە بڕیارێک تاوتوێ بکات، کە تاوەکو 6 مانگی دیکە هەڵپەساردنی سزاکان درێژ بکرێتەوە.

 

سەپاندنەوەی سزاکان دوای بڕیارەکەی مانگی رابردووی بەریتانیا، فەرەنسا و ئەڵمانیا دێت بۆ کاراکردنەوەی میکانیزمی گێڕانەوەی خێرای سزاکان، پاش ئەوەی ئێرانیان بە پێشێلکردنی رێککەوتنی ئەتۆمیی ساڵی 2015 تۆمەتبار کرد.

 

دوای چەندین هەفتە لە دانوستاندن، ئەورووپی و ئێرانییەکان نەگەیشتنە رێککەوتن.

 

دوای ئەوەی ئەورووپییەکان رایانگەیاند، سناپباک کارا دەکەنەوە، عەباس عێراقچی، وەزیری دەرەوەی ئێران چەندین جار لەگەڵ هاوتا فەرەنسی، بەریتانی و ئەڵمانییەکانی کۆبووەوە، لە هەوڵێکدا بۆ گەیشتن بە چارەسەرێکی دیپلۆماسی پێش کۆبوونەوەی ئەم هەفتەیەی کۆمەڵەی گشتیی نەتەوە یەکگرتووەکان، بەڵام گفتوگۆکان بێ ئەنجام بوون.

 

ئێران تاکە وڵاتە کە بەرنامەی چەکی ئەتۆمی نییە و یۆرانیۆم تاوەکو رێژەی 60% دەپیتێنێت، کە نزیکە لە ئاستی پێویست بۆ دروستکردنی چەکی ئەتۆمی.

 

سەرەتای ئەم مانگە، ئێران رێککەوتنێکی لەگەڵ ئاژانسی نێودەوڵەتیی وزەی ئەتۆم واژۆ کرد، کە بە نێوەندگیریی میسر بوو و ئامانج لێی دەستپێکردنەوەی هاوئاهەنگی و پشکنینەکان بوو، بەڵام بەرپرسانی ئێران هۆشدارییان داوە کە ئەگەر سزاکان بگەڕێندرێنەوە، ئەوا رێککەوتنەکە هەڵدەوەشێننەوە و کۆتایی بە هەموو هاوکارییەک لەگەڵ ئاژانسەکە دەهێنن.