حکومەتی ئەڵمانیا بەنیازە کرێی کارکردن زیاد بکات

 

ئێستا کرێی هەر کاژێرێکی کارکردن لە ئەڵمانیا 15 دۆلارە. بە گوێرەی پێشنیازەکە، ساڵی داهاتوو دەکرێتە 16 دۆلار و ساڵی دواتر دەکرێتە 17.11 دۆلار. 

 

ئەگەر پێشنیازەکە پەسندبکرێت ئەوا کەمترین مووچەی مانگانە لە ئەڵمانیا دوو هەزار و 926 دۆلاری ئەمریکی دەبێت، ئەمەش دووەم زۆرترینە لەدوای لوکسمبۆرگ کە سێ هەزار و 88 دۆلارە. لە دوای ئەوانیش بەلجیکا، هۆڵەندا و ئێرلاندە کە نزیکەی دوو هەزار دۆلاری ئەمریکییە. 

 

بەگوێرەی میدیای ئەڵمانیا، پێشنیازەکەی کۆمیسیۆنی کەمترین مووچە لە ئەڵمانیا دەدرێتە وەزارەتی داد و پێویستە لەوێوە پەسند و جێبەجێبکرێت. هەروەها ئەم زیادکردنەی کەمترین مووچەیە بە رەچاوکردنی داهاتی وڵاتەکە، هەڵاوسان و چەند پرسێکی دیکەی ئابووری دەستکاری دەکرێت. 

 

لە دوای جەنگی ئۆکراینا و رووسیا کە شوباتی 2022 دەستیپێکرد، خەرجی وزە و هەڵاوسان لە ئەڵمانیا بەرزبوونەوە. ساڵی 2021 هەڵاوسان لەو وڵاتە 3.1٪ بوو، بەڵام دوای دەستپێکی جەنگ گەیشتە سەرووی 7٪، ئەمەش بەهۆی ئەوەی زۆرینەی نەوت و گازی وڵاتەکە سەرچاوەکەی رووسیا بوو کە بەهۆی جەنگ و سزاکانەوە راگیرا. 

 

پێش هەڵبژاردنی پەرلەمانی ئەڵمانیا لە شوباتی ئەم ساڵ، پارتی سۆسیال دیموکرات و هاوپەیمانی پارتە کریستیانەکان بەڵێنی زیادکردنی کەمترین مووچەیان بە هاووڵاتییانی وڵاتەکەیان دا. ئێستا ئەو پارتانە پێکهێنەری حکومەتن.