حەوت مانگە خانمە کۆچبەرێکی کورد لەسەر سکاڵای دوو کۆچبەری ئێرانی و ئەفغانستانی لە ئیتاڵیا زیندانە

 

جەهانگیر وریانی لە ئەنجوومەنی هەماهەنگیی فیدراسیۆنی کۆمەڵە کوردییەکان میوانی دیاسپۆرا بوو، لەوبارەیەوە رایگەیاند، دۆخی مەیسوون لە گرتووخانەی ئیتاڵیا باش نییە و پەیوەندیی لەگەڵی سەختە، گوتیشی، "چەندین هەڵمەتمان بۆ کەیسەکەی دەستپێکردووە، ئەو لە زیندان دۆخی باش نییە، بە شێوەیەک تاوەکو ئێستا سێ جار مانی لە خواردن گرتووە و لەگەڵ بکوژێکدا بەند کراوە."

 

جەهانگیر وریانی گوتیشی، "مەیسوون لە گرتووخانە ناڕاستەوخۆ ئەشکەنجە دەدرێت."

 

هەر لە بارەی کەیسی مەیسوون؛ نەجمەدین واوی، چالاکی سیاسی و مافی مرۆڤ لە UN، میوانی دیاسپۆرا بوو، لەو بارەیەوە گوتی، "ئیتاڵیا پارێزەرێکی بۆ مەیسوون دیاریکردبوو، کە شارەزایی نەبوو لە کەیسەکە، هەروەها دادگەی ئیتاڵیا بۆی سەلمێندراوە کە مەیسوون تاوانبار نییە، بەڵگەش بۆ ئەمە بوونی شایەتحاڵە، لە دادگە شایەتحاڵان سوێندیان لەسەر بێتاوانبوونی مەیسوون خواردووە."

 

نەجمەدین واوی روونیکردەوە، تاوەکو ئێستا دۆسیەی مەیسوون لە دادگەی ئیتاڵیا سێ قۆناخی بڕیوە، بەڵام لێپرسینەوەکانی دادگەی ئیتاڵیا هیچ ئەنجامێکی ئەرێنیی نەبووە.

 

بە گوتەی ئەو چالاکڤانەی سیاسی و مافی مرۆڤ لە UN، "دەستگیرکردنی مەیسوون لە ئیتاڵیا کاردانەوەی زۆری لێکەوتووەتەوە و مانگی داهاتوو بە فەرمی دادگایی دەکرێت."

 

نەجمەدین واوی ئاشکرای کرد، هەڵبژاردنی ئەورووپا کاریگەریی خراپی لەسەر دۆسیەی مەیسوون هەبوو، هەروەها بەڵگە هەیە رەخنەگرتنی مەیسوون لە شاخوازەکانی ئێران کاریگەریی لەسەر دۆسیەکەی هەبووە.