لەبەردەم باڵیۆزخانەی ئێران لە نەرویج پەتی سێدارە هەڵواسرا
رووداو دیجیتاڵ
لە ئۆسلۆی پایتەختی نەرویج پەتی سێدارە لەبەردەم دەرگای باڵیۆزخانەی ئێران لەو شارە هەڵواسرا، ئەمەش دوای ئەوەی بەرەبەیانی ئەمڕۆ ئێران چوار بەندکراوی کوردی لەسێدارەدا.
بەرەبەیانی رۆژی دووشەممە 29-01-2024 ژمارەیەک هاونیشتمانی و چالاکڤانی کورد، وەکو ناڕەزاییەک لە دژی لەسێدارەدانی چوار بەندکراوی سیاسیی کورد لە گرتووخانەی قزڵحەساری کەرەج، چوونە بەردەم باڵیۆزخانەی ئێران لە ئۆسلۆ.
خۆپێشاندەران چەندین درووشمیان دژی ئێران گوتەوە و پەتێکی سێدارەیان لەبەردەم دەرگای چوونەژوورەوەی باڵیۆزخانەکە هەڵواسی.
ئەو چوار بەندکراوە سیاسییەی کورد کە لەسێدارە دران، ناویان وەفا ئازەربار، موحسین مەزڵووم، پژمان فەتحی و محەممەد فەرامەرزی بوو.