نادیە موراد لە نیویۆرک: دەبێت شنگال و کۆبانێ بپارێزرێن و رێگە لە گەڕانەوەی داعش بگیرێ

 

 

نادیە موراد لە پۆستێکی فەیسبووکدا بڵاویکردەوە، لەگەڵ مایک وۆڵتز، باڵیۆزی ئەمریکا لە نەتەوە یەکگرتووەکان و سەرۆکی کۆمەڵەی گشتیی نەتەوە یەکگرتووەکان کۆبووەتەوە. تەوەری سەرەکیی گفتوگۆکان تایبەت بووە بە دۆخی رۆژئاوای کوردستان و هێرشەکانی ئەم دواییەی سوپای عەرەبیی سووریا بۆ سەر ناوچەکانی ژێر دەسەڵاتی هەسەدە.

 

 

نادیە موراد نیگەرانیی خەڵکی شنگال و رۆژئاوای کوردستانی گەیاندە بەرپرسانی جیهان و جەختی لەوە کردەوە کە "وەستاندنی تووندوتیژییەکان مەرجی سەرەکییە بۆ پاراستنی ئاسایش و سەقامگیریی ناوچەکە."

 

 

1- پاراستنی سەقامگیریی شنگال.

 

2- گەیاندنی هاوکارییە مرۆییەکان بە شێوەیەکی خێرا و سەلامەت بۆ ناوچە زیانلێکەوتووەکان، بەتایبەتی بۆ کۆبانێ و حەسەکە.

 

3- بەهێزکردنی هاوئاهەنگیی نێوان ئاژانسەکانی نەتەوە یەکگرتووەکان بۆ هاوکاریکردنی خەڵکی لێقەوماو.

 

 

براوەی خەڵاتی نۆبڵ داوای لە کۆمەڵگەی نێودەوڵەتی کرد بەرپرسیارێتییەکانیان جێبەجێ بکەن لە رێگریکردن لە تاوانەکانی دژی خەڵکی سڤیل، بەتایبەتی ژنان و منداڵان.

 

نادیە موراد هۆشداری دا لەوەی ناسەقامگیریی ئێستا دەرفەت دەداتە پاشماوەکانی داعش خۆیان رێکبخەنەوە یان لە لێپرسینەوە رابکەن، بەتایبەتی کە هەسەدە پاسەوانیی هەزاران چەکداری داعش و خێزانەکانیان دەکات.