جۆن کێربی: یەكەمین كاردانەوەمان بۆ هێرشی سەر بنكەكەمان دوایین كاردانەوەمان نابێت

 

رۆژی چوارشەممە، 31-1-2024، جۆن کێربی، گوتەبێژی ئەنجوومەنی ئاسایشی نیشتیمانیی ئەمریکا لە کۆشکی سپی لە واشنتن دی سی رایگەیاند، "موقاوەمەی ئیسلامی لە عێراق هێرشەكەی ئوردنی كردووە."

 

رۆژی 28-1-2024، بە درۆن هێرشکرایە سەر هێزەکانی ئەمریکا لە بنکەی تاوەر 22 لە ئوردن، هێرشەکە بووە هۆی کوژرانی سێ سەربازی ئەمریکی و برینداربوونی لانیکەم 41ـی دیکە.

 

سێ رۆژ بوو ئەمریکا لە لێکۆڵینەوە بەردەوامبوو، هەرچەندە پێشتر جۆ بایدن، سەرۆکی ئەمریکا رایگەیاندبوو ئەوان دەزانن گرووپەکانی سەر بە ئێران ئەو کارەیان کردووە.

 

کێربی گوتی: "یەكەمین كاردانەوەمان بۆ هێرشی سەر بنكەكەمان دوایین كاردانەوەمان نابێت."

 

پێشتریش سەرۆکی ئەمریکا رایگەیاندبوو، بڕیاریان لە جۆری وەڵامدانەوەکە داوە و دەکرێت "بە چەند قۆناخ و ئاستێک لە چەند کاتێکی جیاواز وەڵام بدەنەوە."

 

بەرپرسەکەی کۆشکی سپی هەروەها گوتی، "بێ وەڵامیمان لە چەند رۆژی رابردوودا واتای ئەوە نییە بەم جۆرە کارانە بێ وەڵام دەمێنینەوە."

 

دوای هێرشەکە، بایدن و ئیدارەکەی لەلایەن بەرپرسان و سەرکردەکانی حیزبی کۆماریی ئەمریکا رووبەرووی رەخنەیەکی زۆر بوونەوە و داوایان لێکرا هێرش بکەنە سەر ئێران.

 

ناسر کەنعانی، گوتەبێژی وەزارەتی دەرەوەی ئێران رایگەیاند، ئەوان لەپشت ئەو هێرشە نین و تێوەنەگلاون.

 

جەنەراڵ حوسێن سەلامی، فەرماندەی گشتیی سوپای پاسدارانی ئێران بە تووندی رووی دەمی لە ئەمریکا کرد و گوتی، "هەڕەشەی بەرپرسەکانی ئەمریکا بێ وەڵام نامێننەوە. ئێمە چاومان لە شەڕ نییە، بەڵام لە شەڕیش ناترسین."

 

ئەمە کوشندەترین هێرشی سەر هێزەکانی ئەمریکابوو لەوەتەی شەڕی غەززە دەستیپێکردووە و لەوکاتەوە یەکەمجارە سەربازی ئەمریکی لە رۆژهەڵاتی نێوەڕاست بکوژرێت.