بارهەڵگرێک لە ئەمریکا وەرگەڕا و نزیکەی 250 ملیۆن هەنگ هەڵاتن

 

 

بەگوتەی پۆلیسی ناوچەی واتکۆم، رووداوەکە رۆژی هەینی لە نزیک شارۆچکەی لیندن روویدا. شارۆچکەکە دەکەوێتە نزیک سنووری کەنەدا.

 

پۆلیسی ناوچەکە هۆشداری بە دانیشتووانی ناوچەکە دا و گوتی: "بەهۆی هەڵاتنی هەنگەکانەوە، خۆتان لە ناوچەکە بەدوور بگرن."

 

بەرپرسان هانی خەڵکیان دا کە لانیکەم 180 مەتر لە شوێنی وەرگەڕانی بارهەڵگرەکە دووربکەونەوە.

 

ئامی کلاود، گوتەبێژی پۆلیسی ناوچەکە رایگەیاند، پۆلیس بە هاوکاری پسپۆڕانی هەنگ هەوڵی گرتنەوەی هەنگەکان دەدات و تاوەکو ئێستاش ژمارەیەک کارمەندییان لەلایەن هەنگەکانەوە پێوەدراون.

 

تەواوی رێگەی هاتووچۆی ناوچەکە داخراوە و پۆلیس هەوڵ دەدات لە 24 بۆ 48 کاژێری داهاتوودا هەنگەکان بگرنەوە. 

 

تاوەکو ئێستا هۆکاری وەرگەڕانی بارهەڵگرەکە روون نییە و پۆلیسیش هیچی لەبارەیەوە بڵاونەکردووەتەوە.