داهاتی نەوتی فرۆشراو دەچێتە سەر ژمارەی بانکی وەزارەتی دارایی

رووداو - هەولێر

بەپێی بڕیارێکی نێچیرڤان بارزانی، سەرۆکی ئەنجوومەنی وەزیرانی هەرێمی كوردستان داهاتەکانی هەناردەکردن و فرۆشتنی نەوت دەچێتە سەر ژمارەی بانکیی وەزارەتی دارایی و ئابووری حکومەتی هەرێمی کوردستان، ئەمەش لەکاتێکدا پێشتر داهاتە نەوتییەکان دەچوونە سەر ژمارەی بانکیی وەزارەتی سامانە سرووشتییەکان. 

هەر بەپێی ئەو بڕیارە، کە لە 31 ی ئایاری 2015 واژۆی لەسەرکراوە، دەبێت وەزارەتەکانی سامانە سرووشتییەکان و وەزارەتی دارایی هەماهەنگی تەواو بکەن بۆ داڕشتنی میکانیزمێک بۆ ئەو پرۆسەیە، کارکردن بەو بڕیارەش تا کردنەوەی سندوقی کوردستان بۆ داهاتە نەوتیی و گازییەکان دەبێت.

لە چەند هەفتەی رابردوو لە پەرلەمانی کوردستان پڕۆژەیاسای سندوقی داهاتە نەوتییەکان پەسەندکرا، بەپێی ئەو پڕۆژەیاسایەش سەرجەم داهاتە نەوتی و گازییەکان لەو سندوقە دادەنرێن، کە راستەوخۆ سەرۆکی ئەنجوومەنی وەزیران سەرپەرشتی دەکات.

• به‌شی بكه‌ لە
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger