Nûbihar bi jimara xwe ya 176an gihîşt ber destê xwendevanan

Hewlêr (Rûdaw) - Kovara wêjeyî, çandî û hunerî Nûbihar, bi jimara xwe ya 176an bi naverokeke dewlemend û pirreng derket pêşberî xwendevanên Kurdî.

Editoriya kovara Nûbiharê di nivîsa xwe ya destpêkê de diyar dike ku ew di her jimarê de hewl didin cih bidin nivîskarên nû û ciwan da ku rûpelên kovarê ji bo wan bibin qada tecrube û pêşketinê.

Kovara ku di vê jimarê de bi formata serbest hat ber destên xwendevanên xwe, di warê lêkolîn, helbest, çîrok û wergerê de berhemên girîng dihewîne.

Di dimara 176an de naverok û lêkolînên berbiçav:

•             Qelemname di Wêjeyê de: M. Zahîr Ertekîn mijara "Qelemname" ku di wêjeya klasîk de cûreyekî taybet ê diyaloga bi qelemê re ye, di edebiyata Kurmancî (6 nimûne) û Soranî (8 nimûne) de vekolandiye.

•             Ahenga Xweda: Mustafa Ertaş di nivîsa xwe de bala xwe daye ser ahenga nizamê; ew destpêkê ji Quranê û paşê jî ji Dîwana Melayê Cizîrî nimûneyan dide û îzah dike.

•             Nivîskarekî Nenas: Îbrahîm Bulak, di nivîsa xwe ya "Li pey nav û nivîskarekî nenas" de balê dikişîne ser jiyan û keda Mehmet Bor (Huseyin Saritaş) ku di salên 1960î de di kovarên li Ewropayê de nivîsandiye.

•             Alim û Şexsiyet: Bedîrhan Epozdemir li ser jiyan û kesayetiya xêrxwaz a Seydayê Mela Ebdulsemed (1910-2001) nivîsandiye.

•             Dîrok û Berxwedan: Nîhat Gultekîn di salvegera 100î ya Berxwedana Agiriyê de jiyana Rabîa Xanimê ku hevjîna Biroyê Heskê Telî ye û beşdarî berxwedanê bûye, ronî dike.

•             Kolonyalîzm û Xwebarastin: Mustafa Gokkan tevgera Négritude û damezirînerê wê Aimé Césaire raber dike; Solîn Peyman jî di nivîsa "Kolonyalîzm û Berxwedana Miletekî" de li ser nirxên xwebarastina milletekî nîqaşê dike.

•             Hevpeyvîna Mehê: Salih Kevirbirî di vê jimarê de hevpeyvînek bi Serokê Federasyona Kurdên Sovyeta Berê, Şêx Remezanê Seyîd re encam daye.

Wekî din, lêkolîn, çîrok û wergerên nivîskaran ên wekî Mehmet Bor, Felat Dilgeş, Sabrî Akbel, Osman Aytar, Rojbîn Ozkan, Ayşegul Kizilkaya, Faîk Ocal, Miradxan Şemzînî, Dildar Zeynel, Abdulazîz Kan, Xelîl Dihokî û Lokman Polat di kovarê de cih digirin.

Cîhana Helbestê:

Jimara 176an di warê helbest û wergerên helbestan de jî gelekî dewlemend e.

Berken Bereh, Hafizê Şîrazî (werger: Hayrullah Acar), Robert Frost (werger: Rizgar Elegez), Esra Sadikoglu, Sidîq Gorican, Îrfan Amîda, Kevok Mizgîn, Xelîl Îbrahîm Banûkî, Merve Şivan, Kevnarî, Xewneroje, Amîne Pîrozxan, Cahît Zarifoglu (werger: Şahîn Eroglu), Bamed Serdar, MKU Zirkîbeşîran, Hiwa Kadir (werger: Dilovan Alî) û Dogan Sancak bi helbestên xwe reng daye rûpelên kovarê.

Kovara Nûbiharê diyar dike ku di jimarên dahatû de dê bi dosyayên nû û mijarên taybet ên dewlemendtir derkevin ber destê xwendevanên xwe.

Ji bo agahdariya zêdetir û peydakirina kovarê hûn dikarin bi weşanxaneya Nûbiharê re pêwendiyê deynin.