Bo Zhangê Birêvebirê Şaxa Îraqê ya Kompanyaya Zhenhua Oilê got, “Îraq ji bo China Zhenhua Oilê li ser asta cîhanê bazareke gelekî girîng e. Ji ber vê yekê, di salên pêş de jî em dê bi sermaye û teknolojiya xwe zêdetir girîngiyê bidin vê bazarê.”
Zhang Bo diyar kir ku kompanyaya wan heta niha li Îraqê 10 milyar dolar hilberîn kiriye û plan dikin ku di du blokên nû yên keşfê de 10 milyar dolarên din jî veberhênan bikin.
Zhang Bo da zanîn ku Zhenhua Oila ku 17 sal in li Îraqê kar dike, li zeviyên petrolê yên wekî El-Ehdeb û Başûrê Rojhilatê Bexdayê (EBS) dixebite û di heman demê de projeyên ji bo kontrolkirina gaza şewitî jî bi rê ve dibe.
Bo Zhangê Birêvebirê Şaxa Îraqê ya Kompanyaya Zhenhua Oilê pirsên Niwêner Fatîh bersivandin:
Rûdaw: Birêz Bo Zhang, tu bi xêr hatî Rûdawê. Spas ji bo vê derfetê. Dema em behsa sektora petrol û gazê ya Îraqê dikin, bê guman Çîn di vî warî de xwedî roleke diyarker û mezin e. Hûn dikarin behsa kompanyaya xwe û veberhênan û karên xwe yên li Îraqê bikin?
Bo Zhang: Spas ji bo pirsa we. Navê kompanyaya me (China Zhenhua Oil) e. Em piştî PetroChina, Sinopec û CNOOCê, çaremîn kompanyaya dewletê ya herî mezin in. Ango em li Çînê çaremîn kompanyaya petrolê ya herî mezin in.
Bi rastî, îsal sala me ya hevdehan e ku em li Îraqê kar dikin; me di sala 2008an de dest pê kir. Projeya me ya yekem, zeviya petrolê ya El-Ehdeb bû ku me sala 2008an bi hevkariya PetroChina dest pê kir û em operatorê wê zeviyê bûn. Me sala 2018an dest bi projeyeke din kir ku ew jî zeviya Başûrê Rojhilatê Bexdayê (EBS) ye.
Di van şeş salên borî de, kompanyaya me beşdarî pênc-şeş projeyên din ên Wezareta Petrolê bû û her wiha mafê du blokên keşfê jî bi dest xist. Yekem, bloka Qurneyê ya li parêzgeha Necefê ye û ya duyem jî bloka Ebû Xemayê ya li parêzgeha Mûsennayê ye.
Loma, niha bi giştî çar projeyên me hene: Du zeviyên bipêşxistinê û du zeviyên keşfê. Ji bilî van, bazirganiyeke me ya berfireh a petrolê bi SOMO û Îraqê re heye.
Her wiha, Îraq ji bo China Zhenhua Oilê li ser asta cîhanê bazareke gelekî girîng e. Ji ber vê yekê, di salên pêş de jî em dê bi sermaye û teknolojiya xwe zêdetir girîngiyê bidin vê bazarê û ji bo hilberîn û beşdarbûna di pêşketina Îraqê de planên me yên berfireh hene.
Rûdaw: Qebareya giştî ya veberhênana we ya heta niha li Îraqê çi qas e?
Bo Zhang: Heta niha, me bi qasî 10 milyar dolarê Amerîkî hilberîn kiriye. Ev veberhênan ji bo projeyên El-Ehdeb û EBSyê ye. Em plan dikin ku di du blokên keşfê de jî veberhênanê bikin, ku tê çaverêkirin ew jî bigihîje nêzîkî 10 milyar dolaran.
Rûdaw: Bê guman hûn li Îraqê veberhênanê dikin û Çîn yek ji kiriyarên sereke yên petrola Îraqê ye. Piraniya petrola Îraqê diçe Çînê û piştî wê jî diçe Hindistanê.
Bo Zhang: Erê.
Rûdaw: Hûn di heman demê de li ser gaza şewitî jî dixebitin. Îraq di salên dawî de girîngiyeke mezin dide sûdwergirtina ji gaza şewitî. Karê we di vî warî de çi ye? Gelo projeyên we yên bi Hikûmeta Îraqê re ji bo kêmkirina şewitandina gazê hene?
Bo Zhang: Ev pirseke baş e, şewitandina gazê di van salên dawî de li Îraqê bûye mijareke germ. Bi rastî, ji destpêka karê xwe ve, kompanyaya me li gorî rênimayên Wezareta Petrolê tevgeriyaye û hewl daye ku projeyên ji bo kontrolkirina gaza şewitî di zeviyên xwe de bi cih bîne.
Li zeviyên petrolê yên El-Ehdeb û EBSyê, me gelek hewl da û niha em di nava avakirina çend projeyan de ne ji bo kontrolkirina gaza şewitî.
Her wiha di gera pêncemîn û şeşemîn a lîsansdayînê de, çend bendên pir tund li ser kontrolkirina gaza şewitî hatin danîn. Di plana me de ye ku em di destpêka bipêşxistina zeviyên petrolê de bi temamî sûdê ji gazê wergirin da ku di projeyên me yên nû de ti gaz neyê şewitandin.
Rûdaw: We got ku hûn bi SOMOyê re di warê bazirganiya petrolê de dixebitin.
Bo Zhang: Erê, kompanyaya me.
Rûdaw: Hûn çi cure karên bazirganiyê dikin?
Bo Zhang: Kompanyaya me yek ji pênc bazirganên herî mezin e ku bi SOMOyê re kar dike. Bazirganiya me bi giştî ji du beşan pêk tê. Beşa yekem vegerandina lêçûnên me yên ji bo zeviyên wekî El-Ehdeb û EBSyê ye. Beşa duyem jî ew e ku peymanên me yên demdirêj bi SOMOyê re hene.
Rûdaw: Birêz Bo Zhang, gelekî spas ji bo vê derfetê û tu careke din bi xêr hatî Rûdawê.
Bo Zhang: Spas ji bo we.