Hewlêr (Rûdaw) - Bi amadebûna Nêçîrvan Barzanî, li Koleja Leşkerî ya Qelaçolanê ya parêzgeha Silêmaniyê merasîma mezûniyeta xula 5an a xwendekaran tê lidarxistin.
Di merasîmê de 210 xwendekar pileya efseriyê werdigirin.
Bi amadebûna Serokê Herêma Kurdistanê Nêçîrvan Barzanî xwendekarên ku 9 mehan perwerdeya leşkerî ya dijwar dît pileya efseriyê werdigirin.
Hemû beşdarên vê xulê Kurd in û xelkê bajarên cuda yên Herêma Kurdistanê ne.
Yek ji şertên sereke yên beşdariya vê xulê hebûna bawernameya lîsansê ya di beşên cuda de bû.
Beşdarên vê xulê berê di nav hêzên ewlehî û leşkerî yên Kurdistanê de xizmet kiriye û li ser wezaretên Karên Navxwe û Pêşmergeyan hatine dabeşkirin.
Ji 210 derçûyan, 56 xwendekar ser bi hêzên parastin û hawarçûnê yên Wezareta Karên Navxwe ne.
Her wiha 154 xwendekar jî ser bi Wezareta Pêşmergeyan in ku 131 ji wan di nav Hêzên 70yî de ne.
Biryar e piştî wergirtina pileyan, hemû efserên nû vegerin ser karên xwe yên berê û wekî efser dest bi kar bikin.
Ev xul taybetî ji bo mêran bû û hemûyan pêvajoya perwerde û amadehiya leşkerî bi serkeftî qedand.
Armanca vê xulê ew e ku xurtkirina şiyanên Hêzên Pêşmergeyan û hêzên ewlehiyê bi kadroyên akademîk û xwedî bawername pêk were.
