Hewlêr (Rûdaw) - Behmen Ehmediyê 37 salî yê ku ji bo kar ji Urmiyeya Rojhilatê Kurdistanê çûbû Tirkiyeyê, nêzîkî 4 meh in winda ye.
Malbata wî bi rêya Rûdawê bangî xelkê Tirkiyeyê dike ku eger haya kesî jê hebe bi wan re têkiliyê deyne.
Bavê 4 zarokan e
Behmen Ehmedî xelkê herêma Milgeverê ya Urmiyeyê ye û bavê 4 zarokan e.
Li gorî agahiyên ku malbata wî dane, Behmen Ehmedî ji bo karkirinê çûbû Tirkiyeyê.
Beriya niha bi nêzîkî 4 mehan wî telefonî malbata xwe kiribû û gotibû ku ew dê vegere lê belê piştî wê telefonê ti agahî ji wî nehatine girtin.
Bavê wî 3 caran çûye Tirkiyeyê
Murad Ehmediyê bavê Behmen, beşdarî bultena Rûdawê bû ku Sîma Abxêzirê pêşkêş dikir.
Murad Ehmedî diyar kir ku ew ji bo dîtina kurê xwe heta niha 3 caran çûye Tirkiyeyê û bi rêya meqamên Tirk jî hewldanên xwe kirine lê ti encam bi dest nexistiye.
Murad Ehmedî da zanîn ku ji ber windabûna kurê wî, malbat di nav dilgiraniyeke mezin a derûnî de ye.
"Ji bo nanê zarokên xwe çûbû"
Bavê Ehmedî destnîşan kir ku kurê wî ji bo debara malbata xwe ji Urmiyeyê çûbû Tirkiyeyê û li pey çû:
"Ji bo qezenckirina nanê xwe û ji bo ku karibe li zarokên xwe binêre çûbû Tirkiyeyê.
Beriya niha bi 4 mehan telefonî me kir û got dê vegere lê ji wê rojê ve me ti agahî jê nestandine."
Hewldan bê encam mane
Murad Ehmedî eşkere kir ku wî ji bo dîtina kurê xwe her rê ceribandiye û got:
"Ez 3 caran çûm Tirkiyeyê. Min serî li hemû saziyên dewleta Tirkiyeyê da lê mixabin ti encam çênebû. Me ti şop li ser kurê xwe peyda nekir."
Bangî xelkê kir
Murad Ehmedî bi rêya Rûdawê bangî welatiyên li Tirkiyeyê kir ku eger haya kesî ji Behmen Ehmedî hebe bi wan re têkiliyê deyne û anî zimên:
"Ez bangî her kesê xwedî wîjdan dikim. Kî li ser Behmen agahiyekê zanibe bila ji me re bişîne. Qet nebe em zanibin çi bi serê kurê me de hatiye û ev nezelalî bi dawî bibe."
Malbat ji bo dîtina kurê xwe yê bavê 4 zarokan li benda alîkariya saziyên pêwendîdar û welatiyan e.
.jpg&w=3840&q=75)
