Hewlêr (Rûdaw) - Partiya Jiyana Azad a Kurdistanê (PJAK) ragihand ku Supaya Pasdaran a Îranê bi 3 dronan êrişî hêzên wan ên li derdora bajarê Baneyê kiriye lê zerer negihîştiye wan.
Yekîneyên Parastina Rojhilatê Kurdistanê (YRK) ku baskê çekdarî yê PJAKê ye li ser mijarê daxuyaniyek belav kir.
YRKyê di daxuyaniya xwe de diyar kir:
"Doh danê sibehê hêzên Supaya Pasdaran bi 3 dronên bombebarkirî êrişî derdora gundê Şiwêyê yê li nêzîkî bajarê Baneyê yê Rojhilatê Kurdistanê kir."
YRKyê destnîşan kir ku di êrişê de zerer negihîştiye hêzên wan lê gihîştiye bax û rezên xelkê.
Baskê çekdarî yê PJAKê hişyarî da û anî ziman:
"Em wekî Yekîneyên Parastina Rojhilatê Kurdistanê, êrişkaran agahdar dikin ku her cure êrişa li welatê me nayê qebûlkirin û eger ducare bibe, em dê bêguman bersiva pêwîst bidin."
Medyaya nêzîkî Supaya Pasdaran a Îranê belav kiribû ku endamekî hêzên parêzvanên sînor ên Îranê li deverên sînorî yên bajarê Merîwanê “di şerekî li gel komeke çekdar de hatiye kuştin.”
Heman rojê, Birêvebirê Beşa Pêwendiyan a Parêzvanên Sînor ê Sineyê Ferec Rustemî eşkere kir:
"Di rûbirûbûna li gel komeke dijber a li sînorê Merîwanê de, parêzvanekî sînor ê bi navê Danyal Nûriyan hat kuştin."
Ferec Rustemî anî ziman:
"Komeke PJAKê ya ku derbasî nav axa Îranê bûbû û piştî pevçûnê ber bi Îraqê ve reviya."
Li gorî medyaya Îranê, Danyal Nûriyan xelkê Îlama Rojhilatê Kurdistanê bûye.
.jpg&w=3840&q=75)
