Hewlêr (Rûdaw) - Kolberên bi navên Salah Bamîr û Resûl Bamîr ên ku li Şemzînanê hatin desteserkirin û pişt re hatin girtin, ragihand ku li birêvebiriya polîsan rastî şkenceya giran û destdirêjiya zayendî hatine.
Salah Bamîrê 39 salî û Resûl Bamîrê 48 salî li navçeya Şemzînanê ya Colemêrgê hatin desteserkirin û pişt re hatin girtin.
Hat diyarkirin ku di dema desteserkirinê de rastî şkenceya giran hatine û ev îdiayên ku zêdetirî mehekê hatibûn veşartin derketin holê.
Girtiyên li Girtîgeha Colemêrgê piştî ku rewşa xwe ji parêzerên xwe re vegot, ev îdiayên giran ketin rojevê.
Parêzerekî 10ê Hezîranê bi muwekîlên xwe re hevdîtin kir û ji tiştên ku bi serê kolberan de hatine agahdar bû.
Piştî vê yekê parêzer xwest bi birêvebirê girtîgehê re bicive lê daxwaza wî bê hincet hat redkirin.
Piştî ku şaxên Komeleya Mafên Mirovan (ÎHD) û Komeleya Hiqûqnasên ji bo Azadiyê (OHD) yên Colemêrgê li ser mijarê hatin agahdarkirin, parêzeran 22yê Hezîranê bi her du kolberan re hevdîtinek kir.
Di van hevdîtinan de beyanên nivîskî ji her du girtiyan hatin wergirtin.
Şkenceya giran û destdirêjiya zayendî
Li gorî nûçeya Ajansa Mezopotamyayê (MA), di beyanên ku parêzeran wergirtine de Resûl Bamîr diyar kiriye ku di dema desteserkirinê de rastî êrişa zayendî hatiye.
Hat ragihandin ku her du kolber 15ê Gulanê hatine desteserkirin û 3 rojan li Birêvebiriya Polîsan a Şemzînanê rastî şkenceya giran hatine.
Her du kolberên ku 18ê Gulanê hatin girtin, berî ku wan bibin girtîgehê li Nexweşxaneya Dewletê ya Colemêrgê di kontrola tenduristiyê re derbas kirin lê di rapora tenduristiyê de cih nedan êrişa zayendî ya li ser Resûl Bamîr.
Raporên nexweşxaneyê û îdiayên îstixbaratê
Kolberan di beyana xwe de diyar kir, tevî ku ew bi Tirkî nizanin jî di muayeneyê de beyana wan nehatiye wergirtin û wergêr jî li cem wan nebûye.
Li ser giliyê Resûl Bamîr ê 20ê Gulanê, ew dîsa birin heman nexweşxaneyê û destdirêjiya li hemberî wî bi raporê hat piştrastkirin.
Her wiha gardiyanên girtîgehê di beyanên ku dane parêzeran de piştrast kir ku bi şev du kesên ku xwe wekî rayedarên îstixbaratê dane naskirin çûne girtîgehê.
Wan kesan Resûl Bamîr û Salah Bamîr ji jûrên wan derxistine û birine cihê şkenceyê.
Derket holê ku dema gardiyanan rewş ji birêvebirê girtîgehê re vegotiye, wî ji wan re gotiye, "Bêdeng bin, têkilî wê nebin, em nikarin tiştekî bikin."
Şaxên ÎHD û OHDyê yên Colemêrgê li ser berpirsên şkenceyê serî li dadgehê da û giliyê wan kir.
.jpg&w=3840&q=75)
