Hewlêr (Rûdaw) - Alîkarê Parêzgarê Hesekê Ehmed Hîlalî got, “Çavkaniyên Hesekê bi temamî ketin destê Sûriyeyê."
Fermandarê Giştî yê Hêzên Sûriyeya Demokratîk (HSD) Mezlûm Ebdî şeva borî li Şama paytexta Sûriyeyê bi awayê fermî daxuyand ku erkê HSDyê bi dawî bûye.
Alîkarê Parêzgarê Hisîçayê Ehmed Hîlalî ragihand ku fesixkirina HSDyê û tevlîbûna wan a di nav saziyên dewletê de, ji bo vegerandina desthilata dewleta Sûriyeyê ya li parêzgehê, bûyereke çarenûssaz e.
Peymana 29ê Kanûna Paşîn
Ehmed Hîlalî ragihand ku ev encam berhema xebateke bêrawestan a zêdetirî 6 mehan e.
Ev xebat piştî peymana ku di 29ê Kanûna Paşîn a îsal de hatibû îmzekirin dest pê kiribû.
Peymana 29ê Kanûna Paşîn peymaneke agirbestê û pêvajoya tevlîkirinê ye ku di navbera Hikûmeta Sûriyeyê û Hêzên Sûriyeya Demokratîk (HSD) de hatiye îmzekirin.
Li gorî Peymana 29ê Kanûna Paşîn a di navbera Hikûmeta Sûriyeyê û HSDyê de, divê hemû sazî werin yekkirin.
Peyman destnîşan dike ku dê saziyên leşkerî, ewlehî û sivîl ên HSDyê tevlî saziyên dewleta Sûriyeyê bibin.
Hîlalî amaje bi wê yekê kir ku bi hezaran şervanên HSDyê ev çend meh in di çarçoveya peymanên lîwayên ser bi Wezareta Parastinê de ne.
Wî tekez kir ku yekkirina leşkerî ev demek e di qonaxa bicihanînê de ye.
Çavkanî ji sedî 100 di bin kontrola Şamê de ne
Alîkarê Parêzgarê Hisîçayê eşkere kir ku çavkaniyên parêzgehê ji sedî 100 ketine bin kontrola dewleta Sûriyeyê.
Dahata herêmê jî li gorî peymanên qonaxa bê dê vegere xezîneya dewletê.
Hîlalî tekez kir ku fesixkirina HSDyê nayê wateya bidawîbûna dosyeya yekbûnê.
Wî da zanîn ku dosyeyên din dê di bin çavdêrî û çareseriyê de bimînin lê ev yek dê bi rê û rêbazên cuda were kirin.
Her wiha li gorî plan û dîtinên Wezareta Parastinê, ji bo tijekirina valahiyan û dabînkirina aramî û ewlehiyê, hewldanên ji bo belavkirina hêzên yekbûyî yên li Hisîçayê didomin.
