Hewlêr (Rûdaw) - Li navçeya Şarbajêrê ya Silêmaniyê kesekî jîngehdost nêzîkî 30 pezkovî li Silêmaniyê kirîn û devereke çiyayî ya Şarbajêrê azad kirin.
Hacî Şerîf kesekî jîngehdost û xêrxwaz ê ji navçeya Şarbajêr e.
Ew salane çend caran ajel û balindeyên kovî dikire û wan azad dike.
Jîngehdost Şerîf Hacî Resûl li ser vê karê xwe axivî û got:
"Ev pezkovî di baxçeyekî de bûn. Ez çûm tenê ji bo bedewiya wan li wan binihêrim.
Xwediyê wan got ku ew dê wan bifiroşe. Min jî li wê derê biryar da ku ez hemûyan bikirim û azad bikim.
Ji ber vê yekê ez bi Birêvebirê Polîsên Daristan û Jîngehê yê Silêmaniyê û Mamoste Celalê jîngehdost re axivîm.
Armanca me ew bû ku em cihekî guncav ji bo wan bibînin. Berî niha bi sê rojan em hatin Şarbajêrê. Me ev der guncav dît û me ew azad kirin."
Şarbajêr ji bo ajelên kovî guncav e
Şarbajêr navçeyeke tijî deşt, çiya û zozanên asê ye.
Jîngeha wê ji bo jiyana ajel û balindeyên kovî gelekî guncav e.
Jîngehdost Celal Şêx Kerîm jî nêrîna xwe ya li ser vê gavê anî zimên û got:
"Hacî Şerîf li vê navçeyê gaveke gelekî baş avêtiye."
Wî da zanîn ku ev cih ji bo jiyana van ajelên kovî gelekî guncav e û ew dever tijî av û çiya ye û asê ye û got:
"Berê li vê derê hirç û piling jî hatine dîtin. Ev der ji bo jiyana ajelên kovî gelekî baş e."
Gundî alîkariya polîsan dikin
Şêniyên Şarbajêrê bi van cûre karan kêfxweş in.
Ew ji bo parastina ajelan alîkariya hêzên ewlehiyê dikin.
Gundiyê bi navê Elî Hesen li ser mijarê axivî û got:
"Eger em pê bihesin ku kesek ji bo nêçîrê tê, em polîsan agahdar dikin."
Wî diyar kir ku ew carinan bi rêya xizm û nasên xwe jî nêçîrvanan agahdar dikin û wan ji vî karî poşman dikin.
Darizandina nêçîrvanên neyasayî
Bizinên kûvî bi hevahengiya Polîsên Daristan û Jîngehê yên Silêmaniyê hatin azadkirin.
Ev birêvebirî hewl dide pêşiya mirina ajelên kovî bigire.
Birêvebirê Polîsên Daristan û Jîngehê yê Silêmaniyê Emîd Hoşyar Ehmed daxuyaniyek da û got:
"Di çend rojên borî de li vî sînorî du nêçîrvan hatin darizandin û ceza xwarin."
Wî tekez kir ku ew dê tim û daîm çavdêriyê bikin û wiha axivî:
"Li hemû gundan çavkaniyên me hene û xelk zanyariyan dide me. Bêyî cudakarî kîjan kes destdirêjiyê li ser xwezaya Kurdistanê bike, em dê wan bidin darizandin."
Taybetmendiyên pezkoviyên azadkirî
Ev pezkovî li cihekî asê û çiyayî hatin azadkirin.
Temenê wan di navbera 7 meh û 4 salan de ye.
Di nav keriyê de hem bizin hem jî nêrî hene û ew bi hev re hatine berdan.
.webp&w=3840&q=75)
.webp&w=3840&q=75)