.webp&w=3840&q=75)
Hewlêr (Rûdaw) - Tevgera Nifşê Nû helwesta xwe ya fermî ya derbarê avakirina kabîneya nû ya Herêma Kurdistanê de ragihand.
Tevgerê diyar kir ku ew dê bi ti awayî neçin nav hikûmetê û dê di bereya mixalefetê de bimînin.
Berdevkê Tevgera Nifşê Nû Hîmdad Şahîn li ser tora civakî ya Facebookê daxuyaniyek da.
Şahîn di daxuyaniya xwe de got, "Em wekî Nifşê Nû bi ti awayî beşdarî hikûmeta nû ya Herêma Kurdistanê nabin û em dê wekî mixalefet bimînin."
Avakirina kabîneya 10em
Ev daxuyaniya Berdevkê Nifşê Nû di demekê de ye ku hewldanên Partiya Demokrat a Kurdistanê (PDK) û Yekîtiya Niştimanî ya Kurdistanê (YNK) ji bo avakirina kabîneya dehem a Herêma Kurdistanê berdewam dikin.
Peymaneke Nifşê Nû û Yekîtiya Niştimanî ya Kurdistanê (YNK) heye.
2yê Tîrmeha 2026an li bajarê Silêmaniyê merasîma îmzekirina peymana "Hevpeymaniya Hevsengî û Vejînê" ya di navbera YNK û Tevgera Nifşê Nû de hatibû lidarxistin.
Ev merasîm bi amadebûna kesên yekem ên her du partiyan (serokên partiyan) hat lidarxistin.
Civînên YNK û Nifşê Nû
Ji wê demê ve her du alî çend caran civiyane. Civîna wan a dawî roja 9ê Îlonê bû.
YNK û Nifşê Nû piştî civînê ragihandibû, "Her du alî amade ne ku kabîneya nû ya Hikûmeta Herêma Kurdistanê li ser bingeha mafê hilbijartinê ava bikin.
Divê ev hikûmeteke hevseng be û ji aliyê xelkê Herêma Kurdistanê, Îraq û civaka navneteweyî ve were pesendkirin.
Her wiha divê hikûmetek be ku çareseriya bingehîn ji bo pirsgirêkên di navbera Herêma Kurdistanê û Îraqê de di destê wê de be."
Hilbijartinên serdema şeşemîn a Parlamentoya Kurdistanê 20ê Çiriya Pêşîn a 2024an hatin kirin.
Di hilbijartinê de PDKyê 39 kursî, YNKyê 23 kursî û Nifşê Nû jî 15 kursî bi dest xistibûn.
