Hewlêr (Rûdaw) - Malbata Samî Şêxmûs Heso (Sîpan Hesekê) li ser revandin û şehîdxistina wî daxuyaniyek belav kir.
Malbatê bangî raya giştî û hemû aliyên pêwendîdar kir û xwest ku li ser vî sûcî heqîqet û edalet pêk were.
"Nabe ku leşker bibe armanca tolhildanê"
Malbatê di daxuyaniya xwe de bi bîr anî ku Sîpan leşkerek bû û wî di parastina ewlehî û aramiya civakê de erkê xwe bi cih dianî.
Di daxuyaniyê de ev hişyarî hat dayîn:
"Her bûyereke ku di dema pêkanîna erkê leşkerekî de rû bide, divê li gorî qanûn, lêkolîn û dadgehê be. Nabe ku leşker piştî wê li derveyî çarçoveya qanûnê bibe armanca tolhildanê."
"Sûc e, ne tolhildaneke rewa ye"
Malbatê da zanîn ku hinek kes hewl didin şehîdxistina Sîpan wekî "tolhildaneke eşîrî" nîşan bidin ku qaşo bi bûyereke berê ya dema xizmeta wî ve girêdayî ye.
Malbatê ev yek red kir û got:
"Eger li ser bûyereke di dema xizmeta Samî de nakokiyek an tohmetek çêbûbe, rêya qanûnî li ber her kesî vekirî bû.
Lê revandina mirovekî ya ji mala wî û paşê kuştina wî, ne edalet e û ne jî tolhildaneke rewa ye.
Ev sûcek e. Divê ji her kesê ku beşdar bûye, teşwîq kiriye, alîkariya sûcdaran kiriye yan hewl daye wan biparêze, hesab were pirsîn."
"Em tolhildanê ji kesî naxwazin"
Malbata Sîpan Heznî diyar kir ku ew berpirsyariya tiştê qewimî naxin stûyê neteweyekê yan eşîrekê bi tevahî.
Li gorî malbatê, berpirsyariya sûc dikeve ser milê wan kesên ku ew sûc kirine, tê de beşdar bûne yan jî teşwîq kirine.
Malbatê li ser vê yekê jî got, "Ew kes ji kîjan aliyî dibin bila bibin. Her wiha em tolhildanê ji kesî naxwazin. Em naxwazin ku wekî Samî mirovekî din jî bi navê tolhildanê were kuştin."
Daxwazên malbatê zelal in
Malbatê di daxuyaniya xwe de daxwazên xwe wiha rêz kirin:
· Eşkerekirina hemû hûrgiliyên revandin û kuştina Samî.
· Ragihandina encamên lêkolînê ya ji bo raya giştî bi awayekî şefaf.
· Destnîşankirina hemû kesên ku beşdarî sûc bûne. Eger hebe, ne tenê kesekî ku sûc kiriye.
· Lêkolînkirina her teşwîq, alîkarî yan parastineke ku ji kesên têkildar re hatiye pêşkêşkirin.
· Radestkirina her kesê ku berpirsyariya wî hatiye îsbatkirin a ji bo dadgeheke adil û serbixwe.
· Zelalkirina rastiya wê vegotina ku qala "tolhildanê" dike û eşkerekirina pêwendiya wê ya bi bûyer û dosyeyên dadwerî yên berê re.
· Misogerkirina wê yekê ku nasnameyên eşîrî yan neteweyî nebin amûrek ji bo astengkirina qanûnê yan jî parastina tohmetbaran.
"Bila kujer ji ber nasnameya xwe neyê parastin"
Malbatê destnîşan kir ku Sîpan berî ku bibe leşker û karmend, Kurdekî Sûriyeyê bû ku welatê xwe û her welatiyekî diparast û mafê wî yê jiyanê ji ber ol û eşîrê naguhere.
Malbata Sîpan Heznî wiha dawî li daxuyaniya xwe anî:
"Em qebûl nakin ku Sûriye bibe cihekî ku ji mirov li şûna qanûnê bi tolhildanê hesab were pirsîn. Her wiha em red dikin ku kujer ji ber nasnameya xwe ya civakî were parastin.
Em tekez dikin ku em çi ji bo Samî bixwazin, em heman tiştî ji bo her mirovekî li Sûriyeyê jî dixwazin: Ewlehî, rûmet, wekhevî û edalet.
Edalet ji bo Samî, edalet ji bo her qurbaniyekî û qanûn li ser her kesî ye. Rûmet û nemirî ji bo şehîdan. Bijî Kurdistan, bijî gelê Kurd."
.webp&w=3840&q=75)
