Hewlêr (Rûdaw) - Tê angaştkirin ku 18 ciwanên ji Silêmaniyê ku xwestine bi beleman ji Lîbyayê ber bi Îtalyayê ve biçin, ji 5ê Tebaxê ve li Deryaya Spî winda ne.
Çalakvan Renc Pişderî ku dozê dişopîne, diyar kir ku rêxistineke alîkariyê ya Almanyayê ji hewa û deryayê wêneyên 18 kesên mirî girtiye lê xizmên koçberan dibêjin "ew sax in, ji aliyê qaçaxçiyan ve hatine girtin."
Derbarê çarenivîsa ciwanên Kurd ên ku di rêwîtiya xwe ya xeter de bi hêviya gihîştina Ewropayê di avên tarî yên Deryaya Spî de winda bûn, angaşteke xembar derket holê.
Tê gotin ku 18 koçberên Kurd ên ku ji herêma Birêvebiriya Raperînê ya Silêmaniyê derketine û ji 5ê Tebaxê ve hemû pêwendiya wan bi malbatên xwe re qut bûye û dema belema ku ew lê bûn bin av bûye, xeniqîne.
Ji 5ê Tebaxê ve pêwendiya bi wan ew qut bûye
Çalakvanê mafên koçberan Renc Pişderî ku ev mehek e li Ewropayê li ser bûyerê lêkolînan dike, hûrgiliyên trajediyê ji Rûdawê re vegot.
Pişderî diyar kir ku ciwanan 5ê Tebaxê ji malbatên xwe re gotine ku ew dê ji peravên Lîbyayê ber bi Îtalyayê ve biçin û wiha lê zêde kir:
"Qaçaxçiyên mirovan telefonên ciwanan dizîne û ew siwarî keştiyeke taybet kirine. Ji wê rojê ve, yek peyvek ji zarokan nehatiye bihîstin."
Li Îtalyayê ti şop nehat dîtin, nûçeya xembar ji Almanyayê hat
Pişderî li girtîgeh û nexweşxaneyên li seranserê Îtalyayê lêgerîna xwe didomîne.
Rayedarên fermî jê re gotine ku wan îsal 821 cenazeyên nenas ji deryayê derxistine û nekarîne neteweyên wan diyar bikin.
Pişderî diyar kir ku bi nûçeyên ji rêxistineke alîkariyê ya Alman rêça lêpirsînê guheriye û wiha domand:
"Karbidestên rêxistineke lêgerîn û rizgarkirina deryayî ya li Almanyayê bi min re pêwendî danîn.
Wan ragihand ku 15ê Tebaxê di dema mîsyoneke mirovî de li Deryaya Spî, wan 18 term di nav avê de dîtine.
11 ji van ji balafireke keşfê û 7 ji keştiyeke rizgarkirinê hatine wênekirin û tomarkirin.
Wan dîmen nîşanî min dan cenaze ji ber ku di nav avê de bûn nayên naskirin lê cil û êlekên wan û hin nîşanên fîzîkî yên cihêreng piştrast kirin ku ev ciwan beşek ji koma Kurd a winda bûn.
Dîroka noqbûna belemê û hejmara termên hatine dîtin bi temamî li hev dikin."
Hêviya malbatan qut nebûye: Qaçaxçiyan got ku ew hatine girtin
Piştî wî wêneyê tirsnak ku derket holê birayê yek ji koçberên winda, ji Rûdawê re axivî û got ku ew naxwaze bawer bike ku xizmên wan xeniqîne.
Endamê yek ji malbatan angaşt kir ku ciwan sax in û wiha got:
"Qaçaxçiyan ji me re got ku ciwan li deryayê nexeniqîne, ji aliyê hêzên ewlehiyê yên Îtalyayê an jî Lîbyayê ve hatine girtin ango sax hatine girtin. Em bawer dikin ku ew dijîn."
.webp&w=3840&q=75)
