Hewlêr (Rûdaw) - Nêçîrvan Barzanî ji ber bidawîhatina erkê wî Konsulê Giştî yê Rûsyayê yê Hewlêrê Maxim Rubin qebûl kir.
Serokê Herêma Kurdistanê Nêçîrvan Barzanî ji ber hewlên wî yên ji bo bipêşvebirina pêwendiyên dualî spasiya Maxim Rubin kir.
Serokatiya Herêma Kurdistanê li ser civînê daxuyaniyek belav kir.
Hat diyarkirin ku di hevdîtinê de Serokê Herêma Kurdistanê ji bo hewlên wî yên bipêşvebirina pêwendiyên Rûsyayê yên bi Herêma Kurdistanê re spasiya Rubin kir û di erkê wî yê nû de serkeftin jê re xwest.
Konsulê Rûsyayê jî li hemberî vê helwestê spasiya xwe pêşkêşî Serokatî û saziyên Herêma Kurdistanê kir û anî zimên:
"Ji bo wê dostanî û hevkariya berdewam a ku di dema erkê min de ji aliyê aliyên pêwendîdar ên Herêma Kurdistanê ve pêşkêşî min hat kirin, ez gelekî spasdar im."
Hat ragihandin ku di hevdîtina Nêçîrvan Barzanî û Konsulê Rûsyayê de "pêşhatên dawî yên rewşa herêmê ya bi giştî" jî hatin gotûbêjkirin.
